Pli baud er’jau adina sco visitader al Indoor Festival insanua en in chantun cun ina gervosa vid siemiar d’esser sez sin tribuna.
Per Dario Hess na stoi dentant betg adina esser las tribunas grondas. Er las pitschnas hajan lur scharm. Uschè differentas sco las tribunas èn era ses stils da musica. Davent da hardrock, rock’n’roll, blues, country, swing chatt’ins tut en ses repertori. Perquai ha il musicist tuatschin era gia fatg bleras collavuraziuns cun auters musicists.
Jau sun adina avert per novs projects ed igl è era adina interessant da collavurar cun auters.
Inspirà el ha tranter auter era Pascal Gamboni, l’auter Tuatschin. Sco buobet haja el tadlà millis giadas la musica da Gamboni. Cun 12 onns ha Dario Hess lura sez prendì la ghitarra enta maun. Las bleras ideas per nova musica naschian en ses camiun u en l’auto, ma er magari sin canapé u ora en la natira. Cunzunt ils ultims onns fa Dario Hess adina dapli musica per rumantsch.
Cun giacca da tgirom e la cigaretta
Dario Hess è adina stà in rebel, gia da pitschen. El n’haja uschia era betg fatg lev als geniturs. Ed ord il plaschair per la petta e la tschigulatta è lura spert vegnì il gust per la gervosa ed il nicotin. Per las vias cun jeans stgarpads, t-shirts da bands da hardrock e heavy metal e giaccas da tgirom. Quest temp da giuventetgna saja stà in temp dad aur cun bleras libertads. La musica dals onns 90 na plascheva dentant betg a Dario Hess, quai n’era insumma betg ses sound.
Camiunist fin en il Cosovo
Emprendì ha Dario Hess da miradur, dentant gia lura gì il patratg da far in di la patenta dad ir cun camiun che fascinescha el pervia da la grondezza e la forza. Ses camiun è daventà sias quatter paraids sin via. Suenter la recruta è el er stà per la Swisscoy en il Cosovo, nua ch’el ha bainprest cumprà ina ghitarra e procurà per la musica entaifer l’armada svizra.
