Rita Bearth ramassa durant uras ed uras infurmaziuns da diversas famiglias per colliar questas e furmar arbers da famiglia. Sche la dunna da Rabius vesa insatgi sin via, lura sa regorda ella mintgatant che questa persuna ha anc in frar ni ina sora. Ed uschia vegn ella adina puspè tar infurmaziuns u ideas per cuntinuar ina genealogia. Las colliaziuns da persunas e famiglias metta ella lura sin paginas d’internet, per che auters ed autras vesan era quai.
Jau hai ina biadia che ha empermess ch’ella fetschia vinavant.
Il medem fa era Mudest Berther, medemamain da Rabius. El è gia da pitschen s’interessà per autra glieud. Ses tat ha raquintà dad auters, tge ch’els fan e tgi ch’els èn. Cun ses frar è el alura stà a Sumvitg en il archiv da la plaiv, ed ha rimnà las infurmaziuns da sia famiglia. Da la famiglia Berther datti documents che tanschan enavos enfin l’onn 1609. Per Mudest Berther èsi adina bel da crear in arber da famiglia che daventa grond e cumplet.
Jau hai mirveglias tge ch’els fan en 100 onns cun tut mia lavur.
Tuts dus lavuran bler e cun gronda fascinaziun vi da questas genealogias. Rita Bearth e Mudest Berther han boxas plainas cun scrits e fotografias, ordinaturs cun notizias e documents sin il computer. En pli survegnan els infurmaziuns da cartas da morts u da cudeschs da messa.