Siglir tar il cuntegn

Header

cuntegn

Di dal vinil Musica da plattas

Ils 04.05.1887 ha Emil Berliner laschà patentar sia platta da grammofon e dus onns pli tard ha el cumenzà da producir en serias. Suenter la digitalisaziun chatta quella platta puspè la via en bleras stivas – era grazia ad artistas ed artists che publitgeschan lur musica sin questas schibas nairas.

video
Best-of di da vinyl cun DJ Pieder Caminada
Or da Giuventetgna dals 13.08.2021.
laschar ir. Durada: 3 minutas 21 Secundas.

RTR ha emess ils semperverds cun in dj set live giud platta da Pieder Caminada che fascheva ils onns 70 discos a Glion.

Anc mai èsi stà uschè simpel da tadlar musica sco ozendi. Grazia al streaming han tuts en giaglioffa in’immensa mediateca cun tutta musica pussaivla. Tadlar musica cun plattas da vinil è pli sapientiv e pli plaun. Forsa è quai il motiv che la platta è uss gia dapi insaquants onns puspè pli populara.

Era Fiona Fiasco ha publitgà ensemen cun Melodiesinfonie ses album da debut «Forever Faking Memoires» sin vinil.

Daco publitgar ozendi musica sin vinil?

Per Fiona Fiasco erì adina cler ch'ella vul in di producir ina platta da vinil. E quai malgrà ch'ins investeschia dapli en ina platta da vinil. Ella savess era en il futur metter avant da puspè publitgar ina tala platta.

audio
Daco edeschan ins oz puspè sin vinil?
ord Actualitad dals 12.08.2021.
laschar ir. Durada: 2 minutas 33 Secundas.

L’idea da savair registrar musica ed arcunar quella sin in medium da massa per savair vender è gia naschida il 19avel tschientaner. La platta da vinil è lura stada l’emprim medium ch’ins ha pudì producir en serias. Il chau magnetic dal giraplattas mida las undas pressegiadas en il vinil en signals electrics che vegnan lura rinforzai uschia che nus pudain tadlar els en furma da musica.

Co nascha ina platta da vinil?

L'onn 1984 cura ch'il disc cumpact era gest vegnids introducids han ils Hades producì lur emprima platta da vinil cun il tetel «opiniuns». In lung process che ha cuzza 3 mais davent da la registraziun enfin che la platta era producida.

audio
Co vegniva fatg ina platta da vinil?- Hades 1984
ord Actualitad dals 12.08.2021.
laschar ir. Durada: 4 minutas 1 Secunda.

Sch’ins taidla ozendi Hades tar radio RTR lura èn quai datas digitalas. Ina software cumpona tenor diversas reglas ed attributs in raster cun chanzuns per 24 uras program da musica. La redactura ed il redactur da musica elavurescha silsuenter quest raster.

Ord l'archiv:

video
Da la canzun tar la platta da vinil
Or da Svizra rumantscha dals 16.06.1985.
laschar ir. Durada: 23 minutas 24 Secundas.

 Far radio avant 40 onns

Cura che Fina Gaudenz ha cumenzà sco redactura da musica tar RTR n’ha ella betg tschernì la musica d’ina medioteca digitala mabain d’in regal plain plattas. Il moderatur, da lezzas uras Jachen Prevost, ha lura retschet ina chista cun plattas per mintg’ura.

video
Far radio cun plattas da vinil
Or da RTR dals 09.08.2021.
laschar ir. Durada: 11 minutas 3 Secundas.

Passa 3000 plattas da vinil a chasa

Mirco Biondini posseda passa 3000 plattas da vinil. Sia pli emprima platta era da la band britannica «Led Zeppelin» ch’è vegnida enconuschenta mundialmain l’entschatta dals onns 70. La musica giu da las plattas da vinil fascinescha l’um pensiunà cunzunt perquai che nagut è vegnì prendì davent:

L’amur per la platta è che tut quai ch’è vegnì registrà è sin la platta. Las ramurs dals instruments, simplamain tut. E nagut è vegnì prendì davent artifizialmain. L’entira vita da la musica has en la platta, quai n’has betg en la musica digitala.
Autur: Mirco Biondini passiunà musicist e rimnader da plattas
video
Il grond fan da vinil Mirco Biondini
Or da Actualitad dals 12.08.2021.
laschar ir. Durada: 2 minutas 26 Secundas.

Tegnair la platta en il maun ma tadlar via ils autpledaders

Entant ha Mirco Biondini digitalisà tut sias plattas e sa uss cun ina curta retschertga sin ses grond tablet, tadlar tut las chanzuns via ils autpledaders. El sto simplamain nudar la cifra ch’è sin la cuverta da la platta e lura smatgar «play» sin ses tablet.

audio
Mirco Biondini – collecziunader passiuna e freak da vinil
ord Actualitad dals 12.08.2021.
laschar ir. Durada: 3 minutas 6 Secundas.

Natiralmain na saja quai betg il medem sco da tadlar giu d’in giraplattas ma «quai è bler pli pratic che sch’ins stuess tschertgar la chanzun ord 3000 plattas» di el.

RTR actualitad 06:00

Artitgels legids il pli savens