Igl è baud la bun’ura cura che Pieder Vincenz sa metta sin via vers il Plantahof. El gauda l’aria frestga ch’el respira durant pedalar cun ses velo ils bun 13 kilometers ch’el ha da ses da chasa a Haldenstein fin en ses biro a Landquart. «Quai è per mai fitg impurtant ch’jau hai l’aria frestga e ch’jau sun in zic libers era en il patratgar», di il directur dal Plantahof e conceda il medem mument ch’el fetschia quest viadi quotidian bain cun il velo electric e betg cun il velo senza motor. «Sport na pon ins forsa betg numnar quai. Dentant ins è en l’aria frestga e quai fa gia bain.»
Jau sun l'emprim directur ch'ha reducì quest pensum fitg, fitg e ma restrensch be pli sin la politica agrara.
En biro ha el lura mintgamai ina, fin ina ura a mez be per el. Quest temp nizzegia el per liquidar sias pendenzas ch’èn uschè da dir «acutas». Quai èn per exempel mails che spetgan sin ina resposta e ch’el po liquidar cun scriver gia be duas construcziuns. Saja quai tar dumondas d’ordvart tgi ch’è responsabel per tge, dumondas da purs u era dumondas internas pertutgant il persunal.
Dapli biografias interessantas
«Davent da las otg entschaivan lura bleras giadas las sesidas internas, sesidas da projects, gruppas da lavur e magari era dun jau era anc in zic scola», explitgescha Pieder Vincenz ch'ha pudì festivar quest onns ses 50avel anniversari. El saja dentant l’emprim directur che haja reducì quest pensum fitg. Il mument instruescha el cunzunt il rom «politica agrara», nua ch’el ha era blera savida ed experientscha entras sia lavur ch’el ha fatg avant tar l’Uffizi d’agricultura e da geoinfurmaziun.
Dis tipics na datti betg
Ina part fitg impurtanta da sia lavur sco directur dal Plantahof è bain la lavur strategica. Ensemen cun ils quatter ulteriurs commembers da la direcziun emprova el d’elavurar ina strategia tar tschertas tematicas. «Insatge che dovra bain fitg bler temp e ch’ins na po betg simplamain far durant in avant- u suentermezdi», declera el ina da sias incumbensas principalas al Plantahof. «Igl è in process sur pli lung temp.»
-
Bild 1 von 5. Pieder Vincenz, il directur dal Plantahof . L'instituziun chantunala cun passa 100 collavuratur è dapli che be ina scola da purs e puras. Al Plantahof vegn numnadamain era perscrutà, sviluppà e testà novas metodas e tecnicas agricola. El è center da cumpetenza per l’agricultura alpina, lieu d’occurrenzas e dietas ed era in menaschi puril per demonstrar in’agricultura moderna e persistenta. Bildquelle: MAD.
-
Bild 2 von 5. En las muntognas... I na dat nagin lieu, nua ch'el sa senta uschè libers sco en las muntognas. Bildquelle: MAD.
-
Bild 3 von 5. ...cun mountainbike... Per sa recrear e tschentar giu in zic fa el gugent turas cun il mountainbike – magari er anc suenter la lavur. Bildquelle: MAD.
-
Bild 4 von 5. ... u er cun skis... Ina tura da skis dat uschè blera distanza ad el, sco sch'el fiss lunsch davent. Insatge ch'el chatta fitg fascinant. Bildquelle: MAD.
-
Bild 5 von 5. ... èsi per el adina in lieu per bunas ideas. Bunas ideas co ins pudess schliar problems u er tge ch'ins pudess realisar ha Pieder Vincenz mai gì en in biro, mabain adina cura ch'el era sin via insanua en la muntogna. Bildquelle: MAD.
E lura datti natiralmain anc bler auter da far per el e ses collegas da la direcziun: per exempel da mirar che l’entir manaschi dal Plantahof funcziuneschia insumma e che tut saja organisà, da collavurar en ils differents projects ch'il Plantahof è cumiglià u er da sviluppar vinavant tschertas ideas e temas ch’èn actuals sco per exempel il tema dal clima u da la digitalisaziun.
Mintga di porta per tai surpraisas che ti stoss lura era chattar respostas sin quellas.
Sper tut quest planisar, organisar, sviluppar, collavurar en projects, instruir, manar u er prender decisiuns, ha Pieder Vincenz dentant adina era la pussaivladad d'esser fitg datiers a l'agricultura. «Sch'jau vi poss jau ir vi tar il manaschi puril e guardar da l’isch en u er ir sin la pastgira da las vatgas per discutar insatge.» Da pudair esser uschè datiers a la practica chatta el fitg interessant.
E questa vasta variaziun ch'el ha sco directur dal Plantahof motivescha el cunzunt fitg per sia lavur, sco el di. Nagin di saja en sasez sco l'auter. Vitiers vegnia er ch'el saja fitg liber. «Ti vegns la bun'ura en biro e n'has betg ina glista cun incumbensas tge che ti has da far oz e la saira è quella lura simplamain liquidada», fa el a savair el ed agiuntescha che mintga di portia ad el surpraisas. Surpraisas tar las qualas el stoppia sco directur lura er chattar las respostas.
Cuntent ch’i dat tar sia lavur er magari dis u almain muments ch’igl è sco cler tge ch’el ha far u er co el ha da proceder, quai è Pieder Vincenz bain. Pertge quests dis dattan ad el ina tscherta segirtad ed era ruassaivladad.
Interess per l'agricultura grazia a tat e tatta
Da vegnir in di il directur dal Plantahof n'è bain mai stà sia finamira, nundetg in da ses siemis, conceda Pieder Vincenz. Uschia leva el per exempel sco uffant plitost vegnir locomotivist da la Viafier Retica. Dentant quest siemi da manischar in di sez la «Pitschna cotschna» è lura er bain spert puspè stà stulì.
Auter è quai dentant stà cun ses interess per l'agricultura. Quel è gia baud vegnì sveglià da ses tat e tatta che faschevan il pur. «Dapi ch'jau sun stà l'emprima giada cun set onns la stad en plazza tar mes tat e mia tatta a Pigniu, èsi stà relativamain spert cler che mia via vegn ad ir en direcziun agricultura», raquinta Pieder Vincenz. El ha lura lavurà mintga stad tar il tat e pli tard lura era tar l'aug. E grazia a quest access a l'agricultura haja el la fin finala era studegià agronomia a la Scola politecnica federala a Turitg.
Da far sez in di pur fiss bain er stà in'opziun per el. «Sche nus avessan gì a chasa in manaschi puril, avess jau vaira cartaivel surpiglià quest manaschi», manegia el. Dentant sch'el avess fatg il pur, lura be en la muntogna. In'autra opziun ch'el veva anc en testa durant il gimnasi a la Claustra da Mustér era da vegnir in di veterinari. Quai ch'è lura era stà ina da las raschuns daco ch'el ha fatg grec al gimnasi empè d'englais. «Da lez temp avevi numnadamain num: sche ti studegias medischina, stoss ti far grec», sa regorda l'agronom ch'è creschì si a Mustér.
Tranter passa 10'000 nursas
Englais ha Pieder Vincenz lura tuttina anc emprendì. Quai bain durant ses studi a la Scola politecnica federala a Turitg, dentant da tschella vart dal mund. «Jau hai gì il desideri dad ir davent. E perquai ch'jau hai pensà ch'i vegn ad esser pli cumplitgà dad ir davent per in mez onn cura ch'jau hai ina plazza, hai jau fatg in onn intermediar durant il studi», explitgescha el. Fascinà da questa agricultura relativamain extensiva en la Nova Zelanda ha el perquai vulì vesair ina giada pli datiers uschia in grond manaschi da nursas. Mez onn ha el lura pudì ir en la Nova Zelanda e lavurar là sin duas grondas farmas da nursas ch'avevan mintgamai ina surfatscha da 2'500 hectaras e bun 10'000 animals.
Pieder Vincenz en la medias sco directur dal Plantahof
«Quai è stà in super temp, stoss jau dir», è ses curt facit da quest segiurn a l'ester. «Fitg interessant, buna glieud, vai era emprendì in zic englais. Uschia ch'jau avess bain pudì metter avant da star in zic pli ditg là en la Nova Zelanda e lavurar forsa in pèr onns pli ditg sin ina da questas farmas da nursas.» Sia vita saja dentant ida in zic en in'autra direcziun, concluda il directur dal Plantahof.
Betg mes lieu da vegnir vegls
Suenter il studi ha el chattà ina plazza d’agronom gist tier quell’instituziun ch’el maina ussa. Sco cussegliader regiunal dal Plantahof a Glion ha el tranter auter pudì cussegliar menaschis purils en la Surselva en dumondas dal mintgadi. Il desideri da vulair vesair anc insatge auter e da lavurar ina giada tar in grond concern ha la fin finala manà el puspè enavos a Turitg, tar la Migros. «Mia incumbensa era da guardar che las perscripziuns per il label da charn vegnian tegnidas en dals purs che furnivan a la Migros. Uschia ch'jau aveva er là da far cun l'agricultura.»
Dentant uschè spert che Pieder Vincenz è turnà suenter ses studi a Turitg, uschè spert è el la fin finala er puspè stà enavos en il Grischun. «Jau hai simplamain sa fatg en che Turtg n'è pli probabel betg il lieu nua ch'jau vi restar mia entira vita», declera el. «Jau hai sentì là fitg, fitg cler che cunzunt las muntognas mancan a mai.»
Cun sia nova incumbensa sco manader dal post per il svilup regiunal da la Surselva n'è el dentant era betg propi vegnì cuntent. «Jau hai emprendì fitg bler en quest post», sa regorda Pieder Vincenz. Senza l'engaschi da la glieud che lavura e viva en la regiun n'èsi dentant betg stà pussibel per el da pudair realisar sia finamiras. «Sche la glieud che lavura en quellas regiuns e che vul er realisar projects na sa participescha betg, lura èn ins sco pers sin quest post.» E perquai che quai ha duvrà fitg blera energia dad el e ch'el ha er vis ch'el na vegn betg da realisar sias finamiras, è el sa decidì suenter trais onns dar far insatge tut auter: e quai è marketing.
Esser creativ n'è betg uschè simpel
«Da la branscha n'aveva jau betg idea», conceda el e manegia: «Jau aveva dentant per cletg ina buna assistenta ch'enconuscheva la branscha e la reclama. Uschia ch'jau hai pudì emprender fitg bler da lezza .» Ina scolaziun da marketing ha el bain pudì far gia avant da surpigliar sia nova incumbensa tar la cassa da malsauns ÖKK.
Sco responsabel per la planisaziun dal marketing aveva el tranter auter da planisar, crear e realisar campagnas da reclama naziunalas. Ensemen hajan els uschia pudì realisar interessantas campagnas. Quai dentant bain er cun l'agid d'ina agentura ch'ha sustegnì els d'elavurar las campagnas. «Ina lavur fitg creativa che pretenda dentant er fitg bler da tai», resumescha el quels onns tar la ÖKK. Da stuair furnir en in tschert temp ina buna idea, na saja uschè simpel sco quai ch'ins craja.
Furnir en temp ina buna idea n'è betg uschè simpel sco quai ch'ins pensa bleras giadas.
Da questa lavur creativa na lascha Pieder Vincenz insumma betg encrescher. Er cunquai ch'el vesa sia lavur actuala sco directur dal Plantahof er sco lavur creativa. Simplamain en quella branscha ch'el sa senta da chasa. Sia lavur creativa giaja ussa plitost en la direcziun strategica e betg pli en il crear ideas per reclamas.
Ina lavura che plascha fitg bain ad el, sco er quella ch'el ha fatg avant durant 14 onns tar l'Uffizi d'agricultura e da geoinfurmaziun, nua ch'el ha manà tranter auter la part ch'è responsabla per las controllas. «Là hai jau percorsch che l'agricultura e veramain mes da chasa. E da l'autra vart hai jau gì là in extrem bun team.»