Sco mintg'onn l'entschatta da november, sa scuntra era quest onn la scena litterara rumantscha a Domat. Quai suenter ina pausa sfurzada d'in onn, pervi da corona. Il comité d'organisaziun ha cumpilà in program variant sut il motto «giud via».
Nua è la litteratura rumantscha da viadi?
Giud via. Magari va ella sin straduns da bellezza e lura sin streglias stgiras, magari va ella via pulainas e savens stat ella avant spartavias. Adina puspè va ella giud via e sa metta sin fastizs dal nunenconuschent, da l'invisibel, da l'emblidà.
En ina discussiun litterara vegn declerà il present ed il futur da la litteratura rumantscha, cun Flurina Badel, Silvana Derungs e Rico Valär.
Festa da giubileum da 30 onns moderada
Pervi da la pandemia vegn desistì sin la tschaina usitada la sonda saira ed era sin il program spezial da la sonda saira. Ins dovra in certificat ed ì vala l'obligatori da purtar mascrinas.
Uschia vegn era festivà plitost pitschen il giubileum da 30 onns. Tar la «Giubilectura» prelegian 3 giadas 3 auturs ed auturas texts ch'els han scrit a posta per ils Dis da litteratura. Il tema è «litteratura ed jau». La dumengia da mezdi datti in omagi teatral-musical al giubileum, cun Sara Francesca Hermann, Flurin Caviezel ed in osp da surpraisa.
Vernissascha e novas publicaziuns
Franz Hohler festivescha la vernissascha da sia ovra «Fümader passiv, Passivraucher». In cudesch biling en il qual l'autur preschenta texts e poesias che demussan sia relaziun cun il rumantsch sur plirs decennis. Viola Cadruvi preschenta ses nov cudesch «Panuglias da fim» sur da la fin da la vita. Ed Anna Ratti prelegia or da sia ovra «La chesa da sömis» cun blers muments magics.
Autras auturas ed auturs che vegnan a preleger quest onn a Domat èn tranter auter Asa Hendry, Göri Klainguti, Benedetto Vigne, Romana Ganzoni, Laura Schütz ed Iso Camartin.
Esser da la partida davent da chasa
Radiotelevisiun Svizra Rumantscha vegn a rapportar da l'entira occurrenza dals Dis da litteratura. Tranter auter en furma dad in «ticker» online che cuzza da venderdi saira enfin dumengia suentermezdi.