«Vulain telefonar?» avais forsa er udì ubain dumandà quai pli savens en il davos temp? Cura che contacts socials mancan, è il telefon magari ina da las sulettas pussaivladads da communitgar u per scriver. Nus avain vulì far per questa emissiun exact da quels telefons ord il mintgadi. Udir da nossas audituras, co ellas van enturn cun lur mintgadi en quest temp.
Urezza Famos fa ina part da sia lavur en il homeoffice en Engiadina. Cunquai che l'autra part da la lavur e crudada davent, haja ella ussa temp per far chaussas novas. Per exempel construir ina chamona cun ils uffants ubain far cuschinadas ensemen.
Esther Tomaschett ha decidì da passentar intgins dis si culm. Qua possia ella giudair la ruassaivladad, dentant il chau vegnia betg propi liber. En noss temps, possian ins persequitar dapertut las novitads – e quellas fatschentian.
-
Bild 1 von 5. Esther Tomaschett da Trun Campliun sin ses mises. Bildquelle: MAD.
-
Bild 2 von 5. L'actura Annina Sedlacek en ses curtin en il Berner Seeland. Bildquelle: MAD.
-
Bild 3 von 5. Adriana Caminada a casa en ses curtin. Bildquelle: MAD.
-
Bild 4 von 5. Urezza Famos en ses homeoffice en Engiadina. Era ella ha telefonà en l'emissiun da la Marella. Bildquelle: MAD.
-
Bild 5 von 5. Cilgia Koller Mengiardi d'Ardez al telefon cun RTR. Bildquelle: MAD.
Adriana Caminada è magistra da scolina en il homeoffice. Ina sfida speziala per la dunna ch'ha stuì dad ina minuta sin l'autra s'orientar en il mund multimedial. Betg propi ses mund. Ella declera, co ch'ins po far scolina sin distanza e declera, che quai saja ina gronda sfida per tuts.
L' actura Annina Sedlacek è il mument a chasa. Sco actura na po ella actualmain betg lavurar. Bleras occurenzas sajan annuladas ed ins sappia betg, schebain quellas vegnian ad avair lieu pli tard il 2020. In temp intschert, dentant era in temp ch'ins stoppia guardar bain da sasez.
Cilgia Koller Mengiardi viva cun ses um ed ils 5 uffants sin in bain puril ad Ardez. Quest temp mida bler per els, la lavur sin il manaschi è dentant strusch sa midada. Qua ha ella d'organisar la gronda travaglia dal mintgadi.