Era en il rapport ch'è stà la basa da discussiun per il podium en la «Postremise» vegn tematisà il svilup e la funcziun da las uniuns culturalas. Scrit el han ils anteriurs manaders da l'Institut grischun per la perscrutaziun da la cultura (ikg), Georg Jäger e Marius Risi, ch'eran era present quella saira. Quai sin basa da passa 60 intervistas fatgas cun persunas activas en la cultura grischuna.
Bler da quai ch'ins aveva gia descrit ils onns 2006 enfin 2009, cura che las intervistas eran vegnidas fatgas, è per propi era vegnì uschia.
In aspect tematisà dals quatter giasts da la discussiun (Dora Lardelli, Georg Jäger, Gianna Olinda Cadonau e Marius Risi) è la regiunalisaziun. In exempel, nua ch'ins vesa, che la cultura grischuna è sa midada ils davos 30-40 onns. Regiunalisaziun munta, sch'i dat tuttenina empè da trais pli pitschnas uniuns da teater, ina pli gronda che cumpiglia l'entira regiun. Da quels projects regiunals pli gronds dettia adina dapli, di Gianna Olinda Cadonau.
La glieud pli giuvna n'è betg pli pronta d'entrar en in'uniun e far lavur voluntaria gratuita. Per projects che han lieu sulettamain per ina perioda da temp è quella glieud dentant pronta da s'engaschar.
Quels projects gronds sajan savens in'experientscha unica per las participantas ed ils participants – era perquai che laics pon lavurar ed emprender dals profis. Il dischavantatg saja dentant, din Georg Jäger e Gianna Olinda Cadonau, ch'ils projects pli pitschens da las uniuns localas vegnian uschia mess en la sumbriva. I saja era da promover las tradiziuns e las structuras da la cultura dals vitgs, di Georg Jäger. Uniuns dal vitg n'hajan numnadamain betg mo l'intent da crear projects da cultura sco concerts ni teaters, mabain dettian era in sentiment da communitad e segirtad.