Chantaduras e chantadurs da Cuira e plinengiu enfin Tujetsch èn viagiads a Trun en la sala da cultura per sa perfecziunar ed emprender chanzuns novas ch’èn vegnidas inoltradas al davos Festival da la chanzun rumantscha 2025 a Vella. Sper il chant hai era dà la chaschun da gentar da cuminanza e da cultivar contacts vegls e novs. L’aura da naiv e plievgia da la sonda è stada ideala per in di da chant.
Lavur da motivaziun
Per Clau Scherrer e Flavia Walder sco manaders musicals dal di da chant èsi stà ina bella experientscha da pudair beneventar tanta glieud enina. Clau Scherrer: «Tuttenina eran passa 100 dunnas ed umens en sala. Els èn fitg differents, mo han l'interess communabel da chantar e far musica, e da vegnir in u dus pass vinavant entaifer quellas uras.»
Flavia Walder ha ditg ch’ella saja surpraisa da la motivaziun da quellas e quels ch'èn vegnids. «Jau percepeschel che las chantaduras ed ils chantadurs èn fitg concentrads e senz’auter pronts da sa laschar en chanzuns novas.»
Differentas activitads
Il district da chant e l’Uniun ceciliana Surselva porschan era ina scolaziun da chantar per tuttas commembras e commembers dals chors sursilvans. Quella vegn procurada da la chantadura professiunala Letizia Scherrer en collavuraziun cun la Scola da musica Surselva. Daniel Pally di che circa diesch chors hajan gia fatg diever l'onn passà da quella scolaziun, ed ils resuns sajan positivs.
La scolaziun individuala cuntegna ina lecziun generala cun l'entir chor. En las emprovas sequentas datti in'instrucziun da chant da 20 minutas cun mintga commembra u commember interessà. Tgi che vul, po lura frequentar ulteriuras uras da chant tar Letizia Scherrer u a la Scola da musica Surselva.
Nov schlantsch
Cun il di da chant ha il District da chant Surselva la finamira da dar nov schlantsch a la vita dals chors en Surselva. Chantar en in chor duai colliar anc pli fitg. Sper il di da chant porschan il district da chant e l’Uniun ceciliana Surselva era ina scolaziun da chantar per tuttas commembras e commembers dals chors sursilvans.
Quella scolaziun individuala cuntegna ina lecziun generala cun l'entir chor. En las emprovas sequentas datti ina instrucziun da chant da 20 minutas cun mintga commembra u commember interessà.
Litteratura nova
Las chanzuns ch’il chor dal di da chant a Trun ha emprendì d’enconuscher èn cumposiziuns novas. I sa tracta da chanzuns inoltradas al Festival da la chanzun rumantscha da l'atun 2025 a Vella. La gronda part dal chor ad hoc a Trun eran chantaduras e chantadurs da chors sursilvans. Flavia Walder e Clau Scherrer quintan che las dirigentas ed ils dirigents sursilvans vegnan a lavurar en lur chors era cun quellas chanzuns d’auturs e cumponists contemporans. Tenor ils responsabels dal District da chant Surselva duai il proxim di da chant avair lieu il 2027.
Sin Play Festas chattais Vus differentas registraziuns che RTR ha fatg en il decurs dals ultims onns per Vus. Quai èn registraziuns da discs cumpacts, concerts ubain era festas da chant e musica. Nus giavischain bun divertiment da tadlar ils tuns e suns.