Dar protecziun ed ina perspectiva ad uffants cun impediments en India – quai è la missiun dad Edith Stecher. Si’organisaziun a Kollegal en il Sid da l’India ha num perquai «Jeevan Jyothi», translatà «nova vita». L’India ha regalà ad Edith Stecher ina segunda vita. Grazia ad in’emissiun en televisiun è ella partida cun 50 onns a Bangalore, ha vis là co che poppins vegnan vendids, co ch'il sistem da castas renda la vita difficila per las classas socialas las pli bassas ed oravant tut co che uffants cun impediments vegnan negligids.
Perquai ha ella decis da restar ed ha accumpagnà durant ils ultims 25 onns a sur milli uffants da la via tras il temp da scola ed ha tgirà a tschients d’uffants impedids en il center da reabilitaziun, ch’ella ha construì. Impurtant è stà per ella da gidar spezialmain era a mattas tras il temp da scola, uschia ha ella fabritgà era in internat be per mattas. Edith Stecher, oriunda da Tarasp en Engiadina, raquinta en il discurs cun Anna Serarda Campell co ch'ella ha chattà sia clamada, co ch'ella ha midà vestì (da la mandura da biro al sari) e tge frasa da ses bab che l'ha purtada tras la vita plain plaschair e confidenza.
-
Bild 1 von 7. Famiglia Stecher. Da mes bab hai jau emprais, che nagut n’è impussibel, sche ti n’emprovas betg. Edith Stecher è la matta la pli veglia en famiglia. Bildquelle: MAD.
-
Bild 2 von 7. Lai da Tarasp:. Sia uffanza haja ella passentà sin il lai da Tarasp, di Edith Stecher (terza da sanestra). Bildquelle: MAD.
-
Bild 3 von 7. Nazima:. Edith Stecher la fin dals onns 90 en l'India cun ina giuvna che ha num Nazima. Bildquelle: MAD.
-
Bild 4 von 7. «Jau hai avert quatter scolinas per prender uffants davent da la via» Edith Stecher circundada dad uffants che visiteschan las scolas da sia instituziun «Jeevan Jyothi.». Bildquelle: MAD.
-
Bild 5 von 7. Radha & Keerthi:. Edith Stecher ha adoptà ina matta cun ina greva scoliosa, Keerthi è ses num (matta a dretta). Bildquelle: MAD.
-
Bild 6 von 7. Rehab Center. «Nagin vul a quests uffants», di Edith Stecher. En il center da reabilitaziun a Kollegal ch'ella ha fabritgà dat ella in dachasa era ad uffants cun impediments fitg grevs. Bildquelle: MAD.
-
Bild 7 von 7. Ed uschia guarda uss ora il center da l’organisaziun Jeevan Jyothi dad Edith Stecher. Bildquelle: MAD.