25’000 musicantas e musicants han fatg parada a la Festa federala da musica a Bienna ed ils purtrets dals livestreams da RTR cun la concurrenza da marschar han gì passa in mez milliun clics sin Play RTR.
En la famiglia da noss reporter Claudio Spescha ha la musica da marschar ina gronda e lunga tradiziun. Era el ha fatg musica da marschar, suna oz dentant saxofon en ina band da rock. El vul savair: Tge è atgnamain la calamita da la musica da marschar?
Per respunder quella dumonda ha Claudio Spescha accumpagnà las musicantas ed ils musicants da la Societad da musica Trun che fan musica da marschar a moda tradiziunala e la Musikgesellschaft Union Chur che fa furora cun sias evoluziuns e coreografias.
Plinavant è Claudio Spescha ensemen cun ses bab Arnold ch'è anteriur dirigent ed expert, ì sin ils fastizs d’Oscar Tschuor, il cumponist da marschs da Rueun ch’è anc adina enorm popular tar las musicas instrumentalas.
Tut ils videos da la musica da parada a Bienna chattais qua: rtr.ch/emf26