A l'entschatta dals onns novanta è el fugì da sia patria, il Tibet, a pe sur il Himalaja en l'India. Fugì saja el da la suppressiun e da la violenza da la regenza chinaisa cunter il pievel tibetan, raquinta il muntg Lama Lobsang Topgyal da ses passà commovent. Avant era el sa participà a protestas paschaivlas dal moviment d'independenza en il Tibet ed era er vegnì arrestà. Cumprova dal maltractament en praschun dattan las numerusas nattas sin ses dies e sias chommas.
Quai è stà in dir temp. Ma jau na pens betg pli ad el. Jau hai cumpassiun cun ils torturaders da la praschun.
Suenter ses temp en ina claustra budistica en l'India è il muntg ì en l'Engalterra a viver. Là ha Lama Lopsang emprendì d'enconuscher la Tudestga Theresa Mayer, ch'ha sustegnì el da s'orientar e da stabilir in'existenza en l'exil europeic. Entant viva il muntg puspè en claustra en l'India e presta lavur da beneficenza. El organisescha per exempel appels a donaziuns per persunas dischavantagiadas e povras.
En claustra datti tant da far. Nus meditain, legiain scrittiras budisticas, studegiain bler e discutain. Nus bandunain ils mirs claustrals per far lavur caritativa. Ils pli blers muntgs dorman be quatter uras.
E sch'el fa visita a sia amia Theresa Mayer a Turitg, lura organiseschan ils dus meditaziuns budisticas cun chant, uraziun ed ils tuns da cuppettas sonoras. Vita e cretta ha participà ad ina da quellas meditaziuns ed ha vulì savair da Lama Lobsang Topgyal co ch'el dumonda sia vita, co ch'el viva en claustra e tge che sia lavur sociala munta.
Cunquai che Lama Lobsang è stà uschè pers a l’entschatta en Engalterra, hai jau emblidà mintgatant tge erox ch'el è atgnamain.