Exposiziun a Berna - Viva meglier! Davart ils refurmaders da la vita
Il museum istoric da Berna mussa actualmain umans bluts, sadellas per bagnar ils pes e placats cun muntognas grischunas. Tge ha quai da far in cun l’auter? Bler.
Tgi fa fitness, tgi sa nutrescha be pli vegan, tgi renunzia al sgular per proteger il clima: Adina dapli umans impundan adina dapli energia per optimar lur vita. Tgi che manegia che quai saja be in trend dals ultims onns, sbaglia però.
L’exposiziun actuala en il Museum istoric a Berna tematisescha il moviment dals uschenumnads «refurmaders da la vita». Questa noziun stat collectivamain per pliras ideologias da l’entschatta dal 20avel tschientaner en l’Europa: davent da vegetaris, anarchists sur nudists fin naturopats.
Ils refurmaders da la vita han cumenzà a cultivar lur schrebertins, mangiar buglia da Bircher e scuvert lur corps sco insatge estetic. Uschè diversas che lur ideologias èn – ellas sa stentan adina per ina vita armonica tranter uman e natira.
Vita e cretta ha fatg ina visita en il Museum istoric a Berna e discurrì cun Damir Skenderovic, professer d’istorgia da l’universitad da Friburg. El ha manà in project da perscrutaziun davart ils refurmaders da la vita, finanzià dal Fonds naziunal svizzer.
