Il squitsch d’avair success senta Fabienne Dick tuttina. La finala ha ella stuì prender si in credit tar ina banca. I dovra dapli che be gust da far quest pass. Ed i dovra er sustegn da diversas varts – saja quai la vart finanziala ma er la savida.
Ins fa schon ses patratgs. Dumogn jau quai da pajar? Ed jau na vuleva betg disdir.
Mal n'è Fabienne Dick mai stada da surprender la drogaria a Glion cun be 27 onns. Er betg ch’ella ha fatg quest pass gist durant il temp da corona. Ella è in carstgaun che prenda la situaziun sco la è ed emprova da far il meglier. Per fortuna tutgavan las drogarias tar ina branscha che pudeva avair avert durant corona. Tras quai n’haja ella gnanc gì peda da far memia gronds quitads.
Stada mal na sun jau mai.
Per manar ina drogaria ston ins avair fitg blers interess. Ed ins sto er pudair tegnair ora chaussas ed avair plaschair vi da la glieud perquai ch’ins è adina en barat cun glieud: cun clientella, collavuraturas e furniturs.
Nus essan ferms en cussegliar, essan qua per la glieud.
Droghistas vegnan fitg datiers da la clientella, forsa pli datiers che quai ch’ins crai. Per pudair gidar ston ins schon savair pli precis tge che fa mal, dapi cura ch’i fa mal e co i fa mal. E lura vegnan magari schon istorgias pli persunalas ed emoziunalas. E quai è fitg bel, di Fabienne Dick.
