La Festa da la Sontga Crousch è ina festa da baselgia ordvart impurtanta per la plaiv da Savognin. En la baselgia parochiala da Nossadunna vegn numnadamain conservà in toc da la Sontga Crusch da Jesus Cristus. Cumprovà n’èsi betg che quel toc deriva da la crusch, ma i sa basa sin ina tradiziun or d’in chapitel impurtant da l’istorgia dal vitg: Dal temp dals chaputschins.
Per la glieud eri impurtant da colliar lur cretta cun insatge chapaivel. Ils chaputschins ademplivan quai cun far in veritabel commerzi da reliquias. Els promovevan la pietad da la glieud. A Savognin è uschia sa sviluppada ina legenda ad in chapitel impurtant da l'istorgia dal vitg.
Tenor ina veglia legenda dal quart tschientaner aveva la sontga Helena chattà a Jerusalem la crusch a la quala Jesus Cristus era mort. Tocs da questa crusch eran alura arrivads en ils pli differents lieus dal mund.
In toc era vegnì a Savognin. Uschia aveva almain pretendì in pader chaputschin ch'era vegnì a Savognin da l’Italia. Quai en il 17avel tschientaner en il rom da la «Missio raetica» a chaschun da la cuntrarefurmaziun. Dapi ch'il toc lain era vegnì autentifitgà uffizialmain da l'uvestg da Cuira van ins mintg’onn a far processiun cun il lain a chaschun da Festa da la Sontga Crousch.
Quella vegn festivada a maniera pumpusa, cun sajettar murters, cun in servetsch divin festiv cun il chant dal Chor viril baselgia Savognin e la processiun cun musica e chant.
Pli baud è quai stà ina gronda festa emoziunala per nus. Oz hai jau persunalmain dentant in’autra vista da las chaussas. La baselgia semnava in fanatissem per festas ecclesiasticas. Tuttina chat jau bel ed impurtant da mantegnair quella tradiziun a Savognin.
Vita e Cretta discurra cun l'indigen Romano Plaz davart la muntada da la festa e cun il chaputschin Mauro Jöhri davart la muntada spirituala da la Sontga Crusch. Ultra da quai skizzescha l'istoricher da baselgia Jan-Andrea Bernhard la legenda ed explitgescha las circumstanzas, sut las qualas ina legenda è daventada in'impurtanta part da l'istorgia da Savognin.
Schebain che la crusch stat sco simbol per la mort da Jesus Cristus, ha ella ina muntada spirituala che cumpiglia tut las dimensiuns da la vita.
