Frank Baumann, il comedian ch'è vegnì enconuschent tranter auter cun sia emissiun «Ventil» tar SRF la fin dals onns 90, chala sco manader dal festival d'umor ad Arosa. I saja temp da chalar, ha el ditg al schurnal regiunal da SRF.
Tut ha ina fin, mo la liongia ha duas.
15 onns ha l'anteriur moderatur da radio e televisiun, producent e reschissur dastgà trair ils fils sco manader dal festival. Ina funcziun ch'el ha giudì. Gugent sa regorda el dals davos onns.
La concepziun d’in tal program è stada grondiusa. I n’è betg necessari ch’jau vom puspè sin tribuna.
Tranter auter è ina preschentaziun restada en memoria ad el. Ina, cun in chaun che sa numna «Bostitch». Sco el di, saja quai stà in temp grondius. El haja fatg trais giadas 300 preschentaziuns cun il chaun. Uschia saja era stà insatge simpatic sin la tribuna, sco quai ch'el ha ditg rient.
Cun sia moda magari provocanta da cumediant n’aveva el sa chapescha betg mo fans. El sa regorda da scuntradas sin via. «Jau sun vegnì renconuschì sco persuna arroganta» Sco actur saja quai in grond cumpliment, sco individi dentant betg. Quai restia en memoria ad el. Memia persunal n’haja el dentant mai prendì quai.
Ils 17 da december vegni ad esser per el il davos festival d'umor sco directur.