Tut ils daners da taglia da persunas natiralas restan en las plaivs catolicas. Ni l’uvestgieu, ni il Vatican survegnan da quels daners. Daners da taglia che persunas giuridicas pajan, lezs survegn la Baselgia chantunala. Circa 5% da quels daners survegn l’uvestgieu. Quai sa numna «il franc da l'uvestg», di Thomas Bergamin ch’è president da la cumissiun administrativa da la executiva da la Baselgia catolica grischuna.
L’uvestgieu survegn il franc da l'uvestg. Tut il rest dals daners resta en la cassa da la Baselgia chantunala.
Tar la Baselgia refurmada dal chantun Grischun van 3,5 % dals daners da taglia da persunas natiralas a la Baselgia chantunala, declera Erika Cahenzli ch’è la presidenta dal cussegl baselgia da la Baselgia refurmada dal chantun Grischun.
Tant la Baselgia catolica sco la Baselgia refurmada dal chantun Grischun han ina gulivaziun da finanzas tranter plaivs finanzialmain fermas e flaivlas. Ed omaduas baselgias sustegnan er il mantegniment e renovaziuns da baselgias e chapluttas che tutgan a las plaivs.
La Baselgia refurmada promova las plaivs da far concepts d’utilisaziun – co vulain nus duvrar tge baselgia per tge intent?
Ma sche las plaivs perdan adina dapli commembras e commembers sa tschenta la dumonda tgi che mantegn tut las immobiglias. Ed en connex cun sanaziuns energeticas vegni en futur anc a dar grondas sfidas finanzialas.
