«Uss para cler: la Vouta na chatta nagina cuntinuaziun pli.» Quai scriva la suprastanza da la Societad La Vouta en ina charta datada da l’entschatta da matg 2025 e drizzada als commembers ed a las commembras. En quella vegn er annunziada ina radunanza generala per ils 31 da matg cun la tractanda «Schliaziun da la societad».
En in mund ideal avess ins chattà ina cuntinuaziun. Ma forsa èsi meglier da far uss in tagl e guardar sch’i dat insatge nov – empè da far enavant cun insatge mo cun mesa energia.
Betg avunda temp e memia pauc sustegn
La suprastanza cun Anna Serarda Campell, Joannes Bernard Campell, Anna Tina Casanova, Rhea Schudel e Markus Nievergelt aveva gia annunzià la stad passada da sa retrair – perquai ch'i manchian las capacitads per la lavur voluntaria.
A chaschun da la radunanza generala dals 16 da november 2024 è la suprastanza dentant sa cunvegnida da vulair restar en uffizi per ina fasa transitorica. En questa fasa ha ina gruppa da lavur ponderà pussaivladads co cuntinuar cun la purschida da «La Vouta».
Igl è simplamain fitg difficil da chattar persunas che san lavurar quasi gratuitamain per la cultura, e quai er a lunga vista.
Ma in mez onn pli tard constateschan tant la suprastanza sco er la gruppa da lavur cun displaschair, che l'intensitad da la lavur saja vegnida sutvalitada. La gruppa da lavur haja stuì vegnir a la conclusiun ch'i manchia il temp ed il sustegn d'in team pli grond per realisar lur ideas, scrivan els en la brev als commembers ed a las commembras. Tenor questas lingias han ins ponderà differentas opziuns per cuntinuar cun la purschida culturala, tranter auter lavuratoris en differentas disciplinas d'art, dapli occurrenzas per uffants sut il num «La Voutina» ed in concept per «Artists in Residence» a Lavin.
Instituziun culturala dapi l'onn 1997
«La Vouta» è stada durant ils ultims stgars 28 onns il lieu da numerusas occurrenzas culturalas – per teater, musica, prelecziuns ed exposiziuns d'artistas e d'artists dalunsch e damanaivel. La pianista Irène Schweizer, il percussiunist Julian Sartorius, la chantadura Corin Curschellas, l'actur Jaap Achterberg e la cumedianta Hazel Brugger èn stads – ultra da bleras autras artistas ed artists dals ultims onns – giasts en la curt a Lavin.
«La Vouta» haja durant quest temp adina gì la medema filosofia, di la presidenta da l’uniun Anna Serarda Campell. Numnadamain da sminuir ils viadis e purtar en l'Engiadina l’offerta culturala ch’ins chatta uschiglio be en citads lontanas. Quai che muntia era da porscher in program cultural e restar al puls dal temp cun programmar premieras exclusivas en l'Engiadina ed uschia mussar insatge nov - e quai era durant la stagiun morta.
Il bel ed il trist è a medem temp che «La Vouta» è ina istorgia da success – fin e cun l'ultima occurrenza. L'interess dal public u da las artistas e dals artists na manca betg, dentant il temp e l'energia per tut la lavur che succeda davos las culissas.
Sche l'uniun vegn propi schliada la fin da matg u sch'i dat tuttina anc ina schliaziun l'ultim mument, ston las commembras ed ils commembers decider a la radunanza generala extraordinaria.