«Cu jau vi insatge cun il cor, dun jau tut!» – Uschia è quai stà cun emprender rumantsch e cun emprender da sunar ghitarra. Blera pazienza ha el impundì per reussir il transport da ses «Torino» – in auto dal 1971 – da l'Argentina en Svizra. Ambiziun e forza da voluntad èn il fil cotschen en la vita dad Ignacio Perez Prat.
Naschì è el a Buenos Aires, la chapitala da l’Argentina. Là ha el frequentà las scolas e vivì tranter la chapitala e vitgs purils. Il di ch'el ha decidì da studegiar en Germania, haja el impundì tut sias forzas per cuntanscher sias finamiras. Cun be 19 onns è Ignacio Perez Prat emigrà. El ha prendì cumià da sia famiglia, da ses amis e da la patria argentina per far ses studis e ses futur en l’Europa.
La notg avant partir, n'hai jau betg chattà la sien.
Arrivà en Europa è Ignacio Perez Prat ils 22 da favrer 2001. Suenter ses studi d'inschigner a l'Universitad da Karlsruhe en Germania, ha il destin manà el en Svizra. Oz lavura l'inschigner da 41 onns en l'Ospital chantunal a Cuira sco manager per applicaziun digitala e dossiers electronics.
Turas cun ses auto vegl «Torino», ir cun skis ed ir cun velo da muntogna tutgan tar ses hobis. Cura ch'el sa renda per ir cun skis en las muntognas da la Surselva, procuran las colurs da la cuntrada per emoziuns: Las colurs da la naiv ed il tschiel blau fan endament ad el la bandiera «albiceleste» da l'Argentina.