Onn per onn, enturn la fin da zercladur, mainan pasters austriacs var 250 arments da muvel sitg da Sent sur il Cuolmen d’Fenga. La finamira èn las pastgiras largias e frestgas da la Val Fenga. Tar quest passagi che maina sur 2’610 m.s.m. è la muaglia da viadi bunamain 10 uras. Ils arments han da passar tras flums, guauds e gondas, els van sur pastgira, grippa e naiv.
Ils arments che vegnan da l'Engiadina s'uneschan alura durant la stad cun passa 600 arments austriacs e furman uschia en la Val Fenga/Fimbatal ina scossa ordvart gronda. Dapi passa 40 onns da la partida sco paster è Walter Jehle dad Ischgl (A), ils davos 20 onns sco paster grond. Era per el e sia squadra è il passagi sur il Cuolmen d'Fenga mintg'onn ina pitschna aventura.
Paucs pleds – gronds maletgs
L'emissiun «Cuntrasts» da RTR ha vulì documentar filmicamain ina giada quest passagi alpester extraordinari, in passagi arcaic ed autalpin. Ensemen cun l'autur Beat Manetsch è vegnì realisà uschia il film «Fenga» en il decurs dals davos dus onns. Il resultat final è in film senza gronds pleds, ma in film che tegna la tensiun cun in lung flad visual. Ed uschia renda «Fenga» omagi a pastriglia, muaglia ed a la cuntrada muntagnarda.
Il film «Fenga» è vegn mussà ils 13-06-2019 sco premiera a Sent e silsuenter en dus parts en ils Cuntrasts sin SRF1, ils 16-06 ed ils 23-06-2019.
TR Cuntrasts 17:25