L'assassinat dal influencer conservativ Charlie Kirk ha chaschunà ina unda da schoc en ils Stadis Unids. Ella sa mussa sco sfida per la democrazia americana. La professoressa Claudia Franziska Brühwiler analisescha las consequenzas politicas e socialas da quest eveniment tragic.
La professuressa per pensar politic e cultura da l'America (Professor of American Political Thought and Culture) è a l'universitad da Son Gagl. Da ses viadis e studis enconuscha ella la vita e politica en ils Stadis Unids profundamain e commentescha quella regularmain per medias en la Svizra ed en l'exteriur.
Reacziuns polarisantas e la schanza mancada dal president
Il mazzament da Charlie Kirk ha provocà reacziuns fermas en ils Stadis Unids. Bleras persunas republicanas han exprimì lur cordoli, ma la reacziun da Donald Trump ha surprais blers. Empè da clamar a reconciliaziun, haja el cuntinuà cun sia retorica divisiva. Per Claudia Franziska Brühwiler è cler:
Quai è stà in mument fitg trist, nua ch'ins po propi dir ch’il president ha manchentà ina schanza dad agir tenor quai ch'el duess esser: in president per tut las Americanas ed Americans.
Pli che probabel che questa mancanza da manar ha augmentà las tensiuns gia existentas en la societad americana.
Per la professuressa sa mussa la retorica differenta er en las dus reacziuns totalmain differentas da Trump e la vaiva Erika Kirk. Fertant che Erika Kirk ha perdunà a la gronda commemmoraziun a l'assassin da ses um, ha Donald Trump accentuà dad odiar a tut ses opponents e na betg giavischar ad els tut il bun.
In gieu da culpa tranter la dretga e la sanestra
La debatta publica suenter il mordraretsch è daventada in gieu da dar la culpa a l'autra vart. La dretga rinfatscha a la sanestra ch'ella haja creà in clima ostil cun sia retorica, entant che la sanestra vesa la culpa en las leschas d'armas luccas e la retorica da Kirk sez. Claudia Franziska Brühwiler declera:
Igl è in clima nua che tuts emprovan da trair in avantatg politic. Ma igl è natiralmain insatge auter, sche in president vul trair in avantatg da quai. Quai ha ina dimensiun differenta.
In gieu da culpa, da «Peder nair», che impedeschia la discussiun constructiva davart las vairas sfidas da la societad americana e sa concentrescha per la pli gronda part sin ils dus pols sustgaudats dal spectrum politic.
La dimensiun religiusa e l'instrumentalisaziun
La mort da Kirk ha er provocà ina ferma reacziun religiusa, spezialmain en circuls evangelicals. En la commemmoraziun per Charlie Kirk dominava la religiun er ils discurs da las persunas da l'administraziun Trump.
Il president sez ha fatg reverenza en ses discurs en sia retorica tant als sentiments, sco er a motivs religius tipicamain evangelicals.
El ha prendì emprest fitg evidentamain da la retorica evangelicala e quai è gia spezial ord nossa perspectiva. Quai n'è betg uschè spezial per Americans, ma che quai vegn d'in president che appartegna sez ad ina baselgia refurmada, pia betg evangelicala, e che n'è betg enconuschent per in stil da vita particularmain cristian, dat a l'entira chaussa insatge instrumentalisà.
Las analisas da la professuressa da Son Gagl èn stadas gia tema en la Vita e cretta en il super-onn dad elecziuns il 2024. En ses podcast «Grüezi Amerika. Views from the Sister Republic» observescha Claudia Franziska Brühwiler l'actualitad en ils Stadis Unids da la perspectiva da l'istorgia, politica e cultura americana.