Bostga auta, vias cultivadas, a dretg’ed a sanestra lieus per il pos etern, qua e là ina glisch eterna en il stgir. Sco qua sin il santeri Daleu vegni er sin auters santeris pli quiet cur ch’i va vers enviern. Avant quest temp stat dentant anc ina fasa d’operusitad, lura numnadamain, cur che confamigliars u ortulanas fan si las fossas.
Spassegiond tras il santeri Daleu ves'ins dentant che l’emplantaziun è daventada tar blers main opulenta. «Gea» di l’ortulana Michela Projer da Cuira, che tgira ensemen cun ses collegas ortulans tschients da fossas sin tschintg dals otg santeris da Cuira:
Igl è sa midà fitg. Ozendi èsi pli filigran, cun bler da la natira.
Er sch'igl n'è betg pli en il trend dad avair decoraziuns ritgas sin las fossas, saja tuttina da sa tener vi dad in tschert urden sin santeri. Massa blera reducziun na tolereschia quel numnadamain betg:
Igl duai avair insatge verd u fluras, betg be crappa. Quai na permetta l'urden da santeri betg.
Per Urs Tischhauser, il manader da l'orticultura da la citad da Cuira, saja insatge pli che cler, e quai punctuassan els da l'orticultura adina puspè:
Il santeri n’è betg qua per ils morts, ma per ils vivs e quels duajan nizzegiar el er pli fitg.
Ensemen cun questas trais persunas è la Vita e cretta spassegiada tras il santeri Daleu – en occasiun da l'exposiziun da flurs da santeri, che l'Uffizi da sepultura e l'orticultura da la citad da Cuira han fatg l'atun ensemen cun affars d'orticultura da Cuira.