«10 nozzas ad onn» fetschia ella maximalmain, raquinta Nadja Estermann en ses biro a Landquart. Dapi che la mediatura ha surpiglià avant intgins onns dad ina collega la lavur da far nozzas libras, creschia l’interess onn per onn – tar ella, ma er tar sias e ses collegas.
Dador mirs e convenziuns da la baselgia
Ils pèrins, che vegnan tar la ceremonianta Nadja Estermann, veglian bain ina ceremonia festiva, dentant betg en il rom stretg che las baselgias prescrivan.
Savens giavischan ils pèrins in lieu en il liber u er in lieu betg usità. Sco per exempel la halla da glatsch da Tavau, nua che tut la cumpagnia festivescha era sin tribuna sco in club da fans.
Las ceremonias, che Nadja Estermann porscha, cuntegnan bain elements da las ceremonias en baselgia:
Ellas sajan dentant fitg individualas e pervi da quai na fetschia la dunna oriundamain engiadinaisa n'er betg dapli che diesch nozzas ad onn – schebain che l'interess fiss pli grond e creschia pli e pli.
Quest onn fetschian Nadja Estermann e sias e ses 6 collegas quint cun almain 24 nozzas libras. Tut quels pèrins, che vegnan cun lur ceremonias e ceremoniantas u ceremoniants en Grischun, n’én betg inclus en quella calculaziun.
E la sceptica?
Cun sectas u gurus n’hajan nozzas libras insumma da far nagut, di Nadja Estermann cun in surrir, er sch’i dettia adina puspè scepticras u sceptichers tranter las raspadas da festa dals spus, che fan lur ceremonia en questa maniera.
Cun persunas pli scepticas tschertg jau suenter il contact ed enfin uss n’ha jau anc mai gì in resun negativ – silmain en il discurs betg.
In dals rituals, che vegn giavischà savens en nozzas libras è quel da far in nuf celtic. Per far in nuf celtic, declera Nadja Estermann, dovr’ins trais cordas u bindels. In bindel stat per la vita da la spusa, in per quella dal spus ed il terz è quel per lur vita cuminaivla. Ils bindels vegnan liads cun in nuf spezial ed il pèrin tira lura vi da quel per avair la fin las cordas cun il nuf infinit.
Quest nuf celtic è dad in pèrin, ch’è i enfin en l’Irlanda per avair ils bindels originals. Tenor Nadja Estermann saja quai in ritual da nozzas istoric per la glieud pli povra che na savevas betg sa prestar cliniez.
Maridar dador ils mirs e las convenziuns da la baselgia è en il trend. Quai conferma in sguard en la statistica:
La dominanza da las duas baselgias grondas sa diminuescha d’in cuntin, la cifra da las persunas senza confessiun crescha ad in crescher. Dal 1970 era ina persuna da tschient senza confessiun – oz mintga terza insumma. Il svilup en la cuntrada religiusa in Svizra as spievla er pro las nozzas.
In sguard sin la pagina da kirchenstatistik.ch mussa co ch’i stat cun las nozzas – en la Svizra ed er en il Grischun:
- Maridar en la baselgia refurmada è – tenor las cifras – out. Entaifer 60 onns è sa reducida la cifra da nozzas refurmadas per 87% en Svizra e per 78% en Grischun.
- Per il Grischun catolic mussa la pagina be las datas dals ultims 10 onns – ma er là è la direcziun clera, numnadamain engiu: Da passa 170 il 2012 giu sin 70 il 2021. La tendenza Svizra mussa il medem maletg: Da passa 4’500 giu sin stgars 1’800.
Nozzas paran dentant betg dad esser dal tuttafatg or da moda. En il medem temp è sa reducida la cifra da nozzas civilas be per in quart: da 41’574 sin 36’410.
La direcziun è evidenta – davent da baselgia, cretta ed uraziun via en il mund secular. Quai conferma er in sguard sur ils cunfins: En la Germania, l'Austria e la Frantscha datti il medem svilup.
Anc pli cleras vegnan questas cifras sch’ins considerescha la cifra dad abitantas ed abitants: il 1960 cun 5,3 milliuns abitantas ed abitants ed anc quest onn vegn la Svizra ad avair passa 9 milliuns.