«Jau hai lavurà tschients e tschients uras per questa Festa federala da tir – ed hai duvrà blera gnerva», di il schef dal tir Hubert Tomaschett. El è responsabel per tut quai che ha da far cun il sajettar. Il film «Il troubleshooter – La Festa federala da tir tranter tradiziun e digitalisaziun» è tranter auter cun el en gir e mussa quant pretensius che quest job è.
Modernisar e digitalisar ils stans en las regiuns è stà il meglier che nus avain pudì far.
Il telefon da Hubert Tomaschett scalina quasi di e notg. Sch'i dat insanua sin in dals 20 stans da sajettar in problem sto el schliar quel. Tomaschett è 16 uras a di sin pista e quai betg mo a Cuira. Sia finamira è da visitar tut ils 19 stans en las regiuns.
La finamira era da decentralisar enstagl d'organisar la festa mo ad in lieu sco ch'igl è stà il cas ils onns 1842, 1949 e 1985. Lura èsi stà necessari d'engrondir l'infrastructura e puspè dismetter quella suenter la festa. «Modernisar e digitalisar ils stans en las regiuns è stà il meglier che nus avain pudì far», di Hubert Tomaschett.
Mantegnair la tradiziun
Per l’emprima giada insumma na datti nagin cudeschet cun ils resultats stampà – tut è digitalisà. Quai n'è dentant nagin problem per ils tiradurs da Santa Maria.
«Nus faschain tut per els ed els fan tut per nus», di Fadri Conradin, veteran da la societad da tir Santa Maria. Els èn en otg ed han tschernì da sajettar a Grüsch en il Partenz. Il pli vegl commember ha 69 onns, il pli giuven 20. «Nus avain gidà da s’annunziar per il tir cun il computer, els han dapli experientscha cun autras chaussas», di Alessando Roussette.
Suenter che mintgin ha sajettà il program persunal vulan els far ina buna figura sco secziun. Els han dentant in pau discletg cun l’aura.
Da Vancouver a Cuira
Malgrà tut la nova tecnica viva la tradiziun vinavant e carmala schizunt Svizras e Svizzers che vivan a l’exteriur.
I dat differentas occurrenzas spezialas a la Festa federala da tir. Tranter auter il di da las Svizras e dals Svizzers che vivan a l'exteriur. 150 tiraduras e tiradurs da l'entir mund èn vegnids a Cuira. Tranter els Cecilia Decurtins ch'ha ragischs en Surselva. Ella è creschida si a Vancouver en il Canada. Sco buoba accumpagnava ella ses geniturs a sajettar – sajettà sezza n’ha ella mai – fin ch’il bab è mort. Ella ha ertà 32 buis. La gronda part dals schluppets ha ella regalà. Dentant betg tuttas. Cecilia ha numnadamain cumenzà sezza a sajettar.
-
Bild 1 von 3. Per Cecilia Decurtins è la participaziun a la Festa federala da tir a Cuira in grond plaschair. Ella è surstada co che la glieud reagescha sin ses num tipic sursilvan. Bildquelle: RTR.
-
Bild 2 von 3. Ella accentuescha che la festa da tir è bler dapli che mo ina concurrenza sportiva. I sa tracta d’in'occasiun da s'inscuntrar e da tgirar la cuminanza. Bildquelle: RTR.
-
Bild 3 von 3. Bildquelle: RTR.
Blers tiradurs e bleras tiraduras da l’exteriur cumbineschan la participaziun a la Festa federala da tir cun ina visita tar la parentella u cun vacanzas en Svizra.