Quatter giadas visita la SRG SSR quest onn las regiuns linguisticas svizras, per prender il puls da la populaziun sut il motto «Transiziuns». In entir di raquintan redacturas e redacturs dad RTR, da radio SRF1, da Rete Uno e da RTS Première da lur inscunters ed invistas. Tut quai fa part dal nov project interregiunal dals radios «Les autres. Die anderen. Gli altri. Ils auters – Le Tour de Suisse» che la SRG SSR preschenta durant l'onn 2026.
L'acziun cuminaivla dals quatter radios cumenza en il Tessin. En il center stattan ils cunfins cun l'Italia – e discurrì vegn da la cultura, da l'economia e dal mintgadi da quels che traversan mintgadi ils cunfins per gudagnar il paun dal mintgadi.
Ils auters
Spetgar pon ins reportaschas, intervistas ed impressiuns live da lieus da muntada simbolica – vitiers vegnan contribuziuns d'autras regiuns che duain procurar per ina perspectiva naziunala. Mesemna ils 25 da mars s'annunzian RTR ed ils ulteriurs emetturs cun impressiuns dal post da duana tranter Novazzano (CH) e Bizzarone (IT).
Il punct culminant spetga la saira dals 25 da mars, cura che las quatter reportras e reporters sesan ensemen en il studio RSI a Comano. Quels preschentan las pli captivantas impressiuns da lur visitas, en in'emissiun naziunala en tut las quatter linguas.
La finamira dal project «Les autres – Tour de Suisse» è da scuvrir, tge che divida e tge che collia las differentas regiuns linguisticas svizras. Cun istorgias or dal mintgadi e discussiuns envida la SRG SSR il public d'explorar la ritgezza da la Svizra plurilinga. Las emissiuns pon ins tadlar sin RTR, SRF1, Rete Uno e La Première – sco era sin las plattafurmas digitalas dals singuls emetturs.