Quai ch’era en l’America dal Nord dal 19avel tschientaner il Ponyexpress era per la glieud da las Alps il Currier da Lindau: Ina colliaziun sperta e fidada sin ina ruta fadiusa. Fertant che la ruta americana era en funcziun be radund dus onns, faschevan ils curriers en Europa la tura emnila da Lindau sur las Alps a Milaun ed enavos durant plirs tschientaners.
«Jau fiss m'annunzià sco currier da Lindau…»
Sco ils curriers dals temps passads gudogna er l’Engiadinais Men Juon ses mintgadi cun las forza da chavals. Mintga stad passenta el pli che 60 dis en sella per manar plirs tschients giasts davent da San Jon sper Scuol sin ina trentina da differentas turas da plirs dis per e sur las Alps.
Men Juon discurra be gust dal currier istoric:
Sche jau fiss naschì avant 700 onns avess jau er vulì esser currier.
In giavisch, che Men Juon po accumplir questa stad – almain per ina tura.
Omagi sin quatter chommas
Per ina sort omagi sin quatter chommas è l'Engadinais sa mess en viadi ils 22 d’avust cun ina gruppa da 10 giasts davent da Lindau per traversar, sco ils curriers istorics, las Alps. Ina tura betg simpla – ni en temps istorics, ni oz:
Viagiar a chaval era pli baud la regla. Oz è quai l’excepziun. Perquai datti er be fitg paucs lieus per pernottar, ch’èn en vischinanza da la ruta istorica e laschan tuttina passentar nus las notgs en vischinanza da noss chavals.
Auter che lur collegas istorics vegn la gruppa moderna er a far ina ruta pli curta: Da Lindau en set dis ad Andossi en Italia ed en set dis enavos. Ils curriers da Milaun e da Lindau faschevan il viadi Lindau-Milaun ed enavos en mintgamai tschintg dis e mez.
La Marella è sa messa en sella per accumpagnar la gruppa sin ina part da lur aventura tranter istorgia e moderna, sendas istoricas ed autostradas.
-
Bild 1 von 7. 11 dad els èn da la partida. Ils chavals tutgan tuts tar la razza svizra «Freiberger» ed a Men Juon e ses bain da chavals San Jon. Bildquelle: RTR, Isabelle Jaeger.
-
Bild 2 von 7. Planisaziun dal di. Mintga bun’ura discutan il manader da tura Men Juon e ses gidanter Walter Grätzer la ruta e sias sfidas. Bildquelle: RTR, Isabelle Jaeger.
-
Bild 3 von 7. Marella en sella. Cun il microfon sin ils fastizs da l’aventura da viagiar a chaval sur las Alps. Bildquelle: RTR, Isabelle Jaeger.
-
Bild 4 von 7. In stop per guardar la charta. Er sche Men Juon ha fatg gia tut la tura cun il velo datti adina puspè surpraisas. Bildquelle: RTR, Isabelle Jaeger.
-
Bild 5 von 7. Fermativa d’etappa. Sin questa tura fan ils chavals radund 15 enfin 30 kilometers e divers meters d’autezza il di. Bildquelle: RTR, Isabelle Jaeger.
-
Bild 6 von 7. Ina sfida er per ils chavaltgaders dad oz. Amez la Viamala datti tras in grond plazzal da construcziun sper il traffic cun autos, töfs e bus er anc canera da grondas maschinas. Bildquelle: RTR, Isabelle Jaeger.
-
Bild 7 von 7. Plitost sco da pli baud. Fermativa aut si sur la Viamala en il guaud. Bildquelle: RTR, Isabelle Jaeger.