Siglir tar il cuntegn

Header

video
«SUENTER LA PLIEVGIA VEGN IL SULEGL» – In omagi a mia tatta
Or da Cuntrasts dals 01.01.2023.
laschar ir. Durada: 25 minutas 6 Secundas.
cuntegn

In omagi a mia tatta «Suenter la plievgia vegn il sulegl» – in omagi a mia tatta

«Jau sun cuntenta cun mia vita», di mia tatta Johanna che ha 102 onns. In recept per la cuntentientscha n'ha ella betg, dentant: Ella ha realisà quai ch'ella ha vulì. «Jau n'hai betg gì be rosas en mia vita, sun dentant adina stada persvadida che suenter mintga plievgia vegn il sulegl».

Ses umor, ses optimissem, sia moda da sa dustar per survegnir quai ch'ella vul – mia tatta ha schont adina inspirà mai. Avair la cuntentientscha saja tut quai che quinta, quai di ella dapi ch'jau ma regord. Ils ultims mais hai jau accumpagnà Johanna Petschen-Cathomas cun la camera. Il film «Suenter la plievgia vegn il sulegl» è in omagi a mia tatta.

La passiun per sia lavur

Gia sco mattetta ils onns 20 a Trun leva ella adina savair tut. Avair mirveglias haja ella ertà da ses bab. Johanna Petschen-Cathomas era la mesauna da trais fragliuns. Ella ha lavurà sco cusunza e cun 19 onns è ella ida a Cuira per daventar scolasta da lavurs a maun. «Jau hai dà fitg gugent scola. Jau era ina strentga scolasta», sa regorda ella. Ella haja cumandà bler, dentant adina cun la buna, sco ella di.

Cumandar era mia specialitad.
Autur: Johanna Petschen-Cathomas scolasta da lavurs a maun

Auter che pensà

«Jau hai adina ditg che jau na maridia betg», di ella en tutta persvasiun. Sin la dumonda co mes tat haja pudì persvader ella da maridar, di ella: «El ha stuì vegnir sperasvi pliras giadas e la finala hai jau decidì cun il cor. Mes um era in grond, bel e bun – tar el hai jau pudì dir, bain jau marid.» Suenter las nozzas l'onn 1952 ha ella surpiglià la stizun dal vitg a Schlans ed è vegnida mamma da tschintg uffants.

Gronda fidanza

«Nossadunna ha accumpagnà mai mi'entira vita. Ella ha adina dà curaschi da viver endretg», raquinta Johanna en la chaplutta da la chasa d'attempads a Trun. Cura ch'ella aveva tschintg onns ha ella rugà l'emprima giada Nossadunna. Ella ha rugà per sia mamma ch'era savens malsauna e ch'è morta cura che la tatta aveva 40 onns. La fidanza en Nossadunna n'ha ella mai pers. «Jau sper che Nossadunna vegn per mai e ch'ella gida mai da vegnir enten parvis».

Premiera dal film a Trun

L'emprima preschentaziun dal film è stada la gievgia saira en la sala culturala a Trun.

video
Premiera dal film «Suenter la plievgia vegn il sulegl»
Or da Telesguard dals 30.12.2022.
laschar ir. Durada: 3 minutas 22 Secundas.

Cuntrasts 17:30

Artitgels legids il pli savens

Scrollar a sanestra Scrollar a dretga