«Far viadis en il chau» è il chavazzin per il discurs filosofic estiv cun la liricra ed autura Gianna Olinda Cadonau. La dunna engiadinaisa ha studegià relaziuns internaziunalas. Viagiar e s’occupar cun pajais lontans fa part da sia vita. Savurs ed odurs, metter ils pes en il sablun a la riva dal mar – senza quai na giaja betg. Perquai saja ella memia bondriusa. Ella veglia savair, tge che sa zuppa davos la proxima muntogna.
Tuttina furma far viadis en il chau ina part centrala da sia vita.
Far viadis en il chau è insatge dal pli impurtant ed insatge dal meglier ch’i dat per nus umans.
Quai è l’emprim patratg da Gianna Olinda Cadonau tar il chavazzin viadis en il chau. Apaina ch’il pensar sez bandunia il qua ed il uss sajan nus gia en viadi, di la liricra engiadinaisa. Mintga istorgia che nus tadlain u quintain saja in viadi en il chau e quai valia er per sias poesias.
Tschertas poesias èn spir e dir viadis en il chau.
Cun auters pleds – sche la liricra Gianna Olinda Cadonau cumenza da sviluppar sias poesias è ella guida da viadi per che sias lecturas e ses lecturs possian far viadis en il chau.
Tge che la dunna engiadinaisa, che viva e lavura oz a Cuira, manegia da questa circumscripziun dal scriver poesias, savais Vus tadlar en la Vita e cretta ils 14-08, tar la proxima ediziun da nossas baterladas filosoficas.
