Cumenzà ha tut sin il Züriberg. Là s’inscuntran mintga mesemna umans fugitivs per in curs da tudestg en la plaiv Fluntern. Il curs maina la reverenda Chatrina Gaudenz, oriunda da Lavin.
Exodus – en corp ed olma
Ina mesemna spetgava Chatrina Gaudenz las participantas ed ils participants – els na sajan betg adina punctuals. Per far passar il temp s’approfundava ella en in’ovra scientifica davart il tema da l’exodus – ed en quel mument è ella vegnida salidada dad in um african. Quai era Zekarias Kebraeb, autur e schurnalist, fugì da l’Eritrea.
Mia finamira era l’Europa, il paradis. Jau sun fugì da l’Africa perquai che jau vuleva esser liber. Jau na saveva betg quant lunsch che mia fugia vegnia a durar e nua ch’ella vegnia a terminar. Jau saveva mo che jau era en tschertga da la libertad.
-
Bild 1 von 6. Qua en chasa pravenda, ina mesemna suentermezdi, ha cumenzà tut il project. Bildquelle: RTR.
-
Bild 2 von 6. Zekarias Kebraeb, autur e schurnalist, fugì da l’Eritrea. Bildquelle: RTR.
-
Bild 3 von 6. Chatrina Gaudenz dat in curs da tudestg per persunas fugidas. Bildquelle: RTR.
-
Bild 4 von 6. La chasa da pravenda tar la baselgia Fluntern a Turitg. Bildquelle: RTR.
-
Bild 5 von 6. Chatrina Gaudenz en discurs cun Zekarias Kebraeb ed Eleonora Chulowa per la sairada musical-poetica. Bildquelle: RTR.
-
Bild 6 von 6. La finfinala la sairada da la premiera. Bildquelle: RTR.
Quai saja stà il mument, raquinta Chatrina Gaudenz, ch’ella haja savì: quest inscunter è la partenza per in'ulteriura ediziun da ses project musical «Musik und Poesie». L’exodus istoric en cumbinaziun cun l'actual ha inspirà ella da basar quest onn sia seria «Musik und Poesie» sin il text biblic da l’exodus or da l’Egipta, in dals texts pli vegls da l’umanitad.
I ma fascinescha, questa istorgia dad exodus, che cuntegna era fitg bleras dumondas existenzialas. Patria, fugia, cretta, inscunter cun Dieu. Da tschella vart è il tema exodus actualissim. El è fitg brisant pertge che tants umans en noss mund èn en moviment.
-
Bild 1 von 4. Chatrina Gaudenz, oriunda da Lavin, è reverenda a Turitg. Bildquelle: RTR.
-
Bild 2 von 4. Inscunters ils pli differents tutgan tar il mintgadi da la reverenda – precis sco er il giat Momo. Bildquelle: RTR.
-
Bild 3 von 4. La reverenda ha studegià scienzas da religiun cun punct da paisa giudaissem. Bildquelle: RTR.
-
Bild 4 von 4. La gronda baselgia Fluntern en il circul da baselgia 7 da Turitg. Bildquelle: RTR.
Exodus – en pled e musica
Experientschas sco quella da Zekarias Kebraeb en cumbinaziun cun poesias ed autras istorgias da persunas fugidas èn stadas la basa per las cumposiziuns da set studentas e students da la scola da las arts Turitg ZHdK. Ensemen cun in orchester sinfonic e la moderaziun da la reverenda Chatrina Gaudenz haja dà londeror ina sairada poetic-musicala che ha envidà a reflectar:
Jau pens ch’igl è ura e temp che nus guardain quests moviments e che nus vesain er ils avantags – tar tut las difficultads ch'i dat – er ils avantags da quests moviments sin il potenzial dad in moviment dad umans.
-
Bild 1 von 4. La runda da las studentas e dals students da cumposiziun da la ZHdK. Bildquelle: RTR.
-
Bild 2 von 4. L'idea da puspè carmalar cun «Musik und Poesie» glieud en baselgia funcziuna. Bildquelle: RTR.
-
Bild 3 von 4. La premiera è gartegiada. Bildquelle: RTR.
-
Bild 4 von 4. Curt avant la premiera èn finalmain tuttas, tuts e tut pront. Bildquelle: RTR.
Exodus – en tun e maletg
Students e studentas da musica da la Scola auta turitgaisa dals arts han per l’emprima giada la chaschun da cumponer er in orchester. Lur cumposiziuns èn inspiradas dals inscunters ch’els han cun fugitivs, cun persunas che han vivì in «Exodus» real.
Quest’idea dal project musical-poetic tranter persunas en fugia, studentas e students da cumposiziun ed in orchester sinfonic ha er intgantà il reschissur Kurt Reinhard. Perquai ha el observà il project davent da l’emprima idea sur la realisaziun e las emprovas fin a la sairada da la premiera.
Naschids èn ils dus films «La plevonessa» che vegn mussà en ils Cuntrasts dals 22 da december ed «Exodus – Musik und Poesie» da la Sternstunde Musik.