Siglir tar il cuntegn

Header

video
Or da Cuntrasts dals 09.10.2022.
laschar ir. Durada: 25 minutas 50 Secundas.
cuntegn

Ina vita per il ballape L'ultima speranza – la golia Seraina Friedli

Ils ultims mais èn stads turbulents per la golia engiadinaisa Seraina Friedli. Blessuras, la tschertga d'in nov club e dasperas il cumbat per sia posiziun en l'equipa naziunala. Il film «L'ultima speranza – la golia Seraina Friedli» mussa tge ch'i vul dir d'esser ballapedista en Svizra.

L'Engiadina n'è betg gist il lieu ideal per cumenzar ina carriera da ballape. Malgrà che las pussaivladads da trenar èn mediocras, n'ha Seraina Friedli betg laschà starmentar. Ella ha cumenzà sia carriera tar ils Lusitanos da Samedan sco giugadra da reserva. Durant in gieu da campiunadi è la golia sa blessada e Friedli ha ristgà dad ir en goal – per ella in sigl en l'aua fraida.

Jau hai immediat sentì in'amur per la posiziun da golia. A mai plascha quai da pudair esser l'ultima speranza per l'equipa.
Autur: Seraina Friedli golia
Mädchen mit Ball
Legenda: In'amur per la posiziun da golia. Seraina Friedli

Da l'Engiadina ha ella midà tar il FC Tusaun e cun 19 onns è ella vegnida envidada ad in trenament d'emprova tar il FCZ, ina da las meglras equipas svizras. Ch'il FCZ ha engaschà ella lezza giada sco golia numer 3 è stà ina gronda surpraisa. «Jau n'aveva nagina idea tge che quai vul dir da dar ballape sin quest livel. Il trenader ha dentant vesì mes potenzial.»

Perquai ch'jau na deriv betg dad in lieu tipic per il ballape, hai jau gì da cumbatter anc pli fitg per mia carriera. Quella qualitad ha manà mai schizunt en l'equipa naziunala.
Autur: Seraina Friedli golia

Il cumbat per il numer 1

Seraina Friedli è dapi sis onns en l'equipa naziunala ed è stada fin uss mo 10 giadas en acziun. «I n'è betg bel da seser 90 minutas sin il banc e betg savair sch'jau duess far la duscha u betg. Ma u ch'jau sun frustada ni ch'jau dun tut, vegn meglra e poss in di esser il numer 1 en il goal da l'equipa naziunala svizra».

Sch'il trenader Nils Nielsen cumpareglia Friedli cun il numer 1, Gaëlle Thalmann na vesa el betg bleras differenzas: Thalmann haja dapli experientscha e quai possia esser decisiv en in mument che l'equipa è sut pressiun. El è dentant persvads che Seraina Friedli daventa insacura il numer 1.

audio
Discurs cun reschissura Paula Nay
ord Actualitad dals 07.10.2022.
laschar ir. Durada: 7 minutas 55 Secundas.

Il siemi da Seraina Friedli

Il fanadur passà ha Seraina Friedli suttascrit tar ses anteriur club l'FCZ, il campiun svizzer. Ses siemi da chattar in club adattà en l'exteriur e da pudair viver mo dal ballape, n'ha ella anc betg dà si. Per il mument è ses focus dentant sin sia blessura. Pervia da questa blessura manchenta ella mardi proxim l'ultim gieu da qualificaziun per il campiunadi mundial il 2023. La golia è persvadida che la Svizra ha bunas schanzas e ch'ella po probabel ir l'auter onn per l'emprima giada ad in campiunadi mundial.

RTR Cuntrasts 17:25

Artitgels legids il pli savens

Scrollar a sanestra Scrollar a dretga