Sche jau registresch mes podcast emnil per RTR cun mes collega da moderaziun, dastgain nus adina tscherner sezs ils temas. Il format dal «Laberpodcast» lascha tut las libertads.
Persunas cun in impediment spiertal han adina puspè plazza en differentas emissiuns da radio e televisiun u er en autras medias. Savens per respunder a dumondas davart lur impediment. In podcast da tschantscherlar da e cun persunas cun in handicap n'è però betg enconuschent a mai. Quai è l'idea dal Café Movimento. In discurs sut quatter egls, nua che tut ha plaz. Uschia sco che jau dastg far er uschigliò mintg'emna.
Beatrice
Beatrice lavura sco tessunza en il lavuratori da Movimento a Samedan. Tge ch'ella stima tant vi da questa lavur e co ch'ella va enturn cun la mort da sia mamma, udis vus en l'emprima episoda.
Samir
Samir ha 16 onns ed abita cun sia tatta a Sent. Tar Movimento a Scuol lavura el en ufficina e surpiglia mintgatant er il servetsch da telefon. Tge ch'el fa gugent en ses temp liber e nua ch'el arriva il pli gugent ina giada quinta el en episoda 2.
Carmen
Carmen va gugent en sortida. Ella ama la musica, uschè fitg ch'ella chanta perfin suletta sut la duscha. Sia via da la Val Müstair fin a Zernez, in sigl en l'aua d'in mir da 10 meters autezza ed autras aventuras ha ella raquintà, ed ella ha era vulì savair quasi uschè bler da mai.