Belul da l'Eritrea ha in polesch verd. Quel dovra la dunna giuvna per pudair racoltar blers legums, ervas e puma en ses pitschen iert. L’iert da Belul sa chatta sut las vignas davos l'anteriura praschun Sennhof a Cuira.
Jau sai emprender d’enconuscher la cultura, las reglas e la lingua svizra a moda nuncumplitgada en quest rom. E cura che jau sun qua cun mes collegas en l’iert e poss lavurar, sun jau ventiraivla.
Cun autras persunas immigradas, persunas solitarias u talas che vivan en paupradad s'entaupa la giuvna Belul mintga mesemna en ils ierts. L’in u l’autra vegn perfin mintga di per cultivar e tgirar las plantinas en sia parcella.
Il program d'integraziun da success da la HEKS datti gia dapi onns. Ed actualmain en 34 lieus, dapertut en Svizra. Dapi l'onn 2023 ha l’ovra d’agid prendì a fittanza insaquants ierts er a Cuira.
Lur savida acquistada pon las persunas participantas mintgatant era dar vinavant ad autras persunas che cultiveschan ils ierts dasperas. Quai èn muments nua ch’ins è losch.
Las participantas ed ils participants dal program a Cuira cultiveschan ils ierts ensemen cun Karin Roth. Ella è ortulana e pedagoga sociala. Sco responsabla per il program porscha ella maun a las persunas cun scolar ellas en dumondas da nutriment, botanica, ma er da cultura e lingua.
Qua cultivain nus flurs e legums – ed in pau era noss agen futur.
Uschia dat l’iert spazi als ortulans e lur famiglias da lavurar communablamain, d'emprender, da sa recrear e da sa colliar. I vegnan er organisadas regularmain occurrenzas publicas en l'iert. Uschia han ils umans cun ina biografia difficila la pussaivladad da sa scuntrar cun autra glieud dal quartier.
