Il desideri da la dunna da 38 onns saja adina stà dad abitar en in lieu sper la mar. Oz viva Jessica Zuan cun ses um e las duas figlias a Teja, ina citad cun 6’000 abitantas ed abitants en vischinanza da Barcelona. Che la via la mainia davent da l’Engiadina è gia sa mussà cun il fatg ch’ella ha fatg la matura a Genevra en franzos.
Ina vita dominada dal pled e duas culturas
La passiun da Jessica Zuan è daventada sia professiun. L’Engiadinaisa ch’è creschida si a La Punt Chamues-ch ed a Segl scriva gugent. Ella ha gia publitgà plirs cudeschs.
Il pli actual è «Launa da pavagls», in matg da poesias che s’occupan da la relaziun tranter ils umans, l'ir e turnar ed er il spetgar. Ultra da quai lavura Jessica Zuan sco traductura da texts da tut ils geners. Las differentas culturas la stettian ferm a cor, di la dunna che discurra sper rumantsch, tudestg, franzos ed englais er spagnol e catalan. Cun sias duas figlias discurra Jessica Zuan rumantsch.
«Buscha», «spetta» e «tschaina» èn trais pleds che noss vischins en Spagna chapeschan entant er per rumantsch.
Crisas e sfidas
La crisa da finanzas en Spagna ed era la pandemia han influenzà adina puspè ferm la vita da sia famiglia. Surtut las restricziuns durant corona sajan stadas ina gronda sfida per tuts. Turnar en patria na saja dentant per il mument nagin tema.
Or da l'archiv:
