Dapi 25 onns è Jon Domenic Parolini che presidiescha il 2024 la regenza Grischuna politicher da professiun. Sia lavur politica ha cumenzà cun ses engaschament per il rumantsch. El ha gì l’idea per ina giuventetgna rumantscha, la GiuRu.
Che la GiuRu ha fadia da chattar giuvens che vulan sa participar activamain deploresch jau fitg.
E sco suprastant da la Lia Rumantscha ha Jon Domenic Parolini fatg part da la Pro Svizra Rumantscha che vuleva realisar ina gasetta rumantscha dal di. La Quotidiana ha lura bain la Somedia realisà, ma almain ha el pudì gidar da fundar la ANR, l’Agentura da Novitads Rumantscha ch’è vegnida transfurmada en la FMR, la Fundaziun Medias Rumantschas.
Per mai è quai in’istorgia da success sch’ins vesa sco tut quai è sa sviluppà.
Dapi nov onns è Jon Domenic Parolini en la regenza Grischuna. Avant è el stà 14 onns president communal da Scuol. Cura ch’el ha cumenzà a far politica era el commember da la PPS, cun ils virivaris enturn l’elecziun dad Eveline Widmer-Schlumpf en il Cussegl federal è el ì tar la PBD e cun la fusiun cun la PCD fa el uss part da l’Allianza dal Center. Ma ch’el saja ruschnà adina pli sanester, quai lascha Jon Domenic Parolini betg valair.
Ins po contribuir insatge vid il svilup futur, l’avegnir da la societad. E quai fa plaschair.