Ils legendars «Ghostbusters» turnan sin la taila da kino cun la quarta part da la retscha. Quella giada han els da cumbatter cun in nov fenomen surnatiral.
Era Will Smith e Martin Lawrence turnan cun la part quatter da «Bad Boys».
Sin la cuntinuaziun dal victur dad in Oscar han ils fans da kino stuì spetgar passa 20 onns. I dat numnadamain ina cuntinuaziun da «Gladiator». En la rolla principala: Lucius Verus ch'è, en l'emprima part, vegnì spendrà dal gladiatur e herox «Maximus».
L'istorgia da «Joker» da l'onn 2019 cuntinuescha medemamain. Arthur Fleck, ch'era la fin da l'emprim film da «Joker» sa tschentà en la psichiatria a Gotham City frunta là sin ina psicologa che vegn giugada da Lady Gaga. «Joker 2: Folie à Deux».
Er en la sparta dals films animads datti novas aventuras. Numnadamain: «Kung fu Panda 4» ed ils Minions cun «Ich unverbesserlich 4» turnan sin la taila da kino.
Era per ils fans da fantasy datti bunas novas. Ina da las probabel pli enconuschentas serias da film va en ina nova runda. «Der Herr der Ringe – Der Krieg der Rohirrim» vegn il 2024 en ils kinos. Quest film sa differenziescha dentant dal concept cumprovà, i sa tracta numnadamain dad in film animà. L'istorgia gioga 183 onns avant las aventuras da Frodo, Gandalf, Aragorn e tschels camarats.