El è in uvestg cun missiun speziala: Avant 5 onns è Joseph Maria Bonnemain vegnì elegì dal papa Franziscus da vegnir a Cuira a fabritgar punts. Per far quai dastga el perfin restar en uffizi pli ditg che fin la vegliadetgna da 75 onns.
En la Vita e cretta raquinta el, co ch’el è anc adina in viadi cun passiun malgrà ch’el vegn il fanadur 78. Ses tschintg onns sco uvestg da Cuira n’èn betg stads senza difficultads. Las forzas conservativas en l’uvestgieu n’han betg gust dad in curs pli avert e communicativ.
In uvestg – ina missiun: communitgar e far punts
-
Bild 1 von 6. Per communitgar endretg èsi mintgatant er da far sacrifizis – . l’uvestg e la pledadra da medias Nicole Büchel. Bildquelle: RTR.
-
Bild 2 von 6. «Esser pli visibel sco baselgia» – . in dals trais messadis, che l’uvestg è per registrar cuntegn quai ch’è sintomatic per sia lavur insumma. Bildquelle: RTR.
-
Bild 3 von 6. Star nà adina puspè cunter la polarisaziun -. quai stat a cor a l’uvestg Bonnemain. Bildquelle: RTR.
-
Bild 4 von 6. Lavur professiunala davant e davos la camera – . in sguard en il studio episcopal. Bildquelle: RTR.
-
Bild 5 von 6. Trais messadis registrescha l’uvestg en stgars in’ura – . lura spetga gia il proxim termin. Bildquelle: RTR.
-
Bild 6 von 6. Communitgar per fabritgar punts -. e magari er per purtar in zic dapli glisch en las profunditads da l’uvestgieu da Cuira. Bildquelle: RTR.
La sfida da la divisiun: L'uvestg che vul far punts
Da far questas punts saja e restia ina sfida en l’uvestgieu da Cuira raquinta l’uvestg en la Vita e cretta.
Sche jau pretendess che tuttas tensiuns fissan svanidas dal tuttafatg, na fiss jau betg onest.
La divisiun e polarisaziun che regna en il mund ed en la societad sa mussia betg be, dentant er en la baselgia. Là vul Bonnemain cuntinuar cun sia via ed empruvar da manar la discussiun ed il dialog cun tuts.
Sia devisa è clera: «Nus na dastgain betg dar si. Pia far tut il pussaivel per che la communicaziun, il dialog, il respect per l'esser different, per ils fugitivs – quel èsi da promover en noss mund.»
Ensemen per la cretta: La rolla da l’uvestg auxiliar
Malgrà sia energia duai l’uvestg survegnir vers la fin da quest onn sustegn. Il papa ha aderì a sia dumonda da nominar in uvestg auxiliar per Cuira. Tgi che quai vegn ad esser decida la fin dals quints il papa or da trais nominaziuns che l’uvestg da Cuira ha pudì far.
El na basegna dentant betg in levgiament en sias lavurs ed in sustegn administrativ, ma ina forza supplementara en las chaussas da la cretta.
Jau dovrel l’uvestg auxiliar per rinforzar la colliaziun cun Dieu sin tut ils livels da l’uvestgieu, per ina renovaziun spirituala en l’uvestgieu.
Jesus sco center e via per l'avegnir
Il giavisch per l’avegnir da la diocesa da Cuira è cler per l’uvestg Bonnemain: Sa chattar en il center cuminaivel, en Jesus.
Sche mintgina e mintgin da nus tgira ina relaziun profunda tar Jesus è quai il lieu nua che nus ans chattain.