Ella na vuleva betg maridar in pur. Ma i è vegni auter. Oz di Rosina Derungs: «Ils animals am dattan quietezza e cuntentientscha, senza els mancass insatge.» Pudair lavurar autonom ed esser atgna patruna saja in privilegi che porta cun sai era sfidas en la vita purila da muntogna sin 1'500 meters sur mar. Rosina Derungs e ses um Edwin mainan ensemen in manaschi da vatgas-mamma a Vrin Ligiazun.
La fracziun entadim la Val Lumnezia è circumdada da prads stips cun access difficil per maschinas agriculas. En l'emissiun Vita e Cretta ans raquinta Rosina Derungs da sia vita quotidiana sco pura da muntogna, davart las sfidas dal mintgadi cun ils animals, davart la mancanza d’aua ma era co ella vesa la posiziun da la dunna en il manaschi puril.
Rosina Derungs sa che blers purs na pudessan betg exister senza agid da lur dunnas. Perquai è la mamma da trais uffants persvasa ch'i saja necessari che la politica svizra fetschia uss prescha pertutgand dapli segirtad sociala per dunnas da purs.