Ch’i saja en nossa vita professiunala u privata; senza savair leger e scriver n’è noss mintgadi strusch da s’imaginar. Ma co èsi sch’ins ha miseria cun quai? Cun tge stigma vegn ins chargià sch’ins na sa betg formular in e-mail senza sbagls? Èsi pussaivel da far in studi sch’ils bustabs davant ins n’èn savens nagut auter ch’in caos?
Quai è adina denturn, ma jau fatsch il meglier ordlonder.
Enfin 8% da la populaziun viva cun ina tala flaivlezza. Tar furmas deblas sa laschia viver bain cun ina tala, ma en cas pli gravants po ella era franar ina carriera da scola ed esser ina paisa psicologica.
Cura che jau hai survegnì la diagnosa, hai jau ditg dad aut: Ah, jau na sun gea gnanc tuppa!
En La Marella raquintan duas dunnas pertutgadas da lur percurs e da quai ch’ha gidà ellas. Plinavant explitgescha ina pedagoga curativa da las midadas dals ultims onns e tge che la scola populara porscha ozendi ad uffants pertutgads.
In disturbi da leger e scriver è insatge che resta per vita duranta. Perquai è il pli impurtant d’emprender baud diversas strategias che gidan a vegnir a frida cun la situaziun.
