Siglir tar il cuntegn

Header

audio
«Ella era ina dunna emancipada ed independenta»
Or da Marella dals 14.05.2023. Maletg: MAD Forum Cultural Breil
laschar ir. Durada: 45 minutas 42 Secundas.
cuntegn

La Marella «Ella era ina dunna emancipada ed independenta»

Omagi a Fausta Capaul (1847 – 1927), la dunna ch’ha lantschà il turissem a Breil.

Ozendi è Breil pli in lieu da turissem ch'in lieu d’agricultura. Il turissem, quel è arrivà en il vitget avant 150 onns, quai era grazia a la Fausta Capaul. La giuvna è stada buna da realisar sia visiun professiunala, in project extraordinari per quest lieu e quest temp.

Co il turissem è arrivà a Breil

Il 1870, suenter la mort da ses bab, decida Fausta Capaul da transfurmar la chasa paterna en ina pensiun per giasts. Danunder ch’ella prenda inspiraziun & resursas per realisar quest project na san ins betg. Dentant il 1873 publitgescha ella in inserat en la gasetta «Der Freie Rätier», ina publicaziun che vul carmalar natiers turists e che po perquai vegnir considerada sco crap da fundament dal turissem a Breil.

Il vitg da Breil
Legenda: Il vitg da Breil ca. 1900 Biblioteca naziunala svizra / Archiv Rudolf Zinggeler (1990)
Ella è per franc stada ina dunna ferma, iniziativa e curaschusa.
Autur: Michael Friberg Forum Cultural Breil

En ils decennis che suondan passentan giasts da l’entira Svizra e da l’exteriur lur vacanzas en la Casa Fausta Capaul; blers alpinists, umens da fatschenta, artists ubain era professers – ed ina giada è schizunt ina regina vegnida a gentar!

Fausta Capaul (cun scussal) en discurs cun ses osps (ca. 1900)
Legenda: Fausta Capaul (cun scussal) en discurs cun ses osps (ca. 1900) Biblioteca naziunala / archiv Rudolf Zinggeler (1900)
Menschen werden kommen, Und werden alle «unisono» singen: Heil Brigels dir! Jedoch was wärst du ohne Fausta Capaul? Dieses Haus ist deine Krone.
Autur: Marguerite Ulrich giast en la pensiun (1909), inscripziun en il cudesch dad osps

Funtaunas directas da la Fausta Capaul na datti strusch, ma grazia a funtaunas secundaras emprova La Marella da purtretar questa dunna curaschusa, quai cun agid da Michael Friberg (Forum Cultural Breil) e cun duas vuschs or da l'archiv da radio; quella dad Otto Friberg (figliol da la Fausta Capaul) e dad Elsa Friberg (successura da la Fausta Capaul).

L’actur David Flepp prelegia passaschas or da diversas funtaunas.

Breil undrescha sia piuniera

Cura ch’ins discurra da piuniers dal turissem en il Grischun, emblid’ins savens la Fausta Capaul. Gist perquai vulain nus ussa render omagi a questa dunna.
Autur: Michael Friberg Forum Cultural Breil
Visualisaziun da la tribuna da l’inscenaziun «FAUSTA piuniera»
Legenda: Visualisaziun da la tribuna da l’inscenaziun «FAUSTA piuniera» Annadora Friberg

Da matg enfin il settember dal 2023 rendan diversas occurrenzas onur a la piuniera Fausta Capaul: in'inscenaziun teatral-musicala, in’exposiziun d’art en la Casa Fausta Capaul ed ina discussiun davart il futur dal turissem. Plinavant ha la vischnanca renovà il «Curtgin Crest La Crusch», in lieu ch’ils osps da la Fausta Capaul numnavan il «Belveder» pervia da la bella vista.

Dapli infurmaziuns davart las festivitads èn da chattar en la rait.

RTR Marella 09:00

Artitgels legids il pli savens