L’identitad da gender è insatge cumplex e la summa da numerus facturs (biologics, socials e culturals). En Svizra sa defineschan da quai da 150'000 persunas sco «nunbinaras». Questas persunas na sa reconuschan betg en il sistem binar ch'ha dominà durant tschientaners, e na sa sentan betg pledentadas, cura ch’ins numna ellas «um» ubain «dunna». Sche nus ans distanziain dal sistem binar e contemplain l'identitad da gender sco spectrum cun dapli pussaivladads, lura ha quai era in'influenza sin nossa lingua.
Gist nus Rumantsch:as savain gea bain che la lingua po contribuir a la construcziun d’ina identitad.
Persunas che sa sentivan nunbinaras hai gia adina dà. Ma ozendi s’etableschan adina dapli pleds che gidan a francar e render visiblas questas identitads da gender: nunbinar, genderfluid, transgender, queer etc. Ed era noss verbs, adjectivs e pronoms ston magari vegnir adattads, sch’ins vul «gendrar» - quai vul dir: sch’ins vul duvrar ina lingua che reflectescha e pledenta l’umanitad en tut sias fassettas. Fin qua na devi nagin’unitad concernent il gendrar per rumantsch. Ma ussa exista in mussavia che po gidar a s’avischinar pass per pass ad ina lingua inclusiva.
Quai na fa gea mal a nagin, sche jau scriv 'student:as' – cun in punct dubel.
