En trais chapitels sa fatschenta La Marella cun il silenzi e ses cuntrari:
Mintg’onn moran circa 500 persunas pervia da la canera!
En in emprim chapitel lascha La Marella vegnir a pled Peter Ettler. Sco president da la «Lärmliga Schweiz» vegn el confruntà regularmain cun las consequenzas che la canera ha sin l’organissem dad umans: stress, agressivitad, miserias da sa concentrar, difficultads d’emprender, diabetes e malsognas cardiovascularas – per mo numnar intginas.
Quai che l’organisaziun observa era: il silenzi è vida daventar ina chaussa che mo ils pli privilegiads pon sa prestar, fertant che la populaziun dischavantagiada è obligada da viver en lieus exponids a canera e metta entras quai en privel sia sanadad.
Il silenzi fa tema, i n’è betg simpel d’al supportar!
En in segund chapitel sa focussescha La Marella sin il silenzi, insatge che Linus Berther enconuscha bain. Dapi onns è el scolar da zen e fa regularmain entiras emnas da meditaziun silenziusa en in center da furmaziun da la Svizra centrala.
Lev na saja betg da supportar il silenzi, pertge el ans confruntia cun noss mund intern. Forsa è quai in motiv, pertge che bleras e blers da nus paran da betg pli vertir silenzi e tschertgan semper ina distracziun auditiva?
Questa stanza è segir in dals lieus ils pli silenzius da la Svizra
En in terz chapitel fa La Marella ina visita al METAS. Là sa chatta ina raritad: ina stanza anecoica, nua che nagut na resuna!
Questa stanza dovra il METAS per far verificaziuns da mesiras. Ma tgisà, pudessan questas stanzas silenziusas era influenzar l’architectura dal futur?
RTR Marella 11:00