Bellezza è quai che plascha a nus, quai che nus valitain sco insatge positiv. Plirs studis davart l'uschenumnà fenomen da «Pretty Privilege», pia il privilegi da bellezza, mussan che persunas bellas han en tscherts secturs da la vita pli simpel. Tgi ch'è attractiv ha dapli success, chatta pli simpel ina lavur, ina pli auta posiziun ed ina pli auta paja. Dentant era en la vita privata vegnan talas persunas privilegiadas. Persunas che na correspundan betg a las normas da bellezza ord vista da la societad han perencunter pli grev. Ma tge è questa norma insumma? E tge è bellezza insumma ord vista da la societad?
Istorgia da la bellezza
Durant il temp è l'ideal da bellezza adina puspè sa midà. Quai sa mussa per exempel tar il corp. Durant il temp antic valevan proporziuns equilibradas sco bel. En il temp medieval eran las dunnas savens androginas. En il baroc valeva corpulenza sco segn da bainstanza e bellezza. Davent da magher tar corpulent è l'ideal da bellezza adina puspè sa midà. Adina puspè èn quests trends da bellezza era s'orientads vi d'idols ed erox dal temps. Anc oz sa differenzieschan ils standards da bellezza en las differentas parts dal mund.
Bellezza en la musica
La bellezza, perfecziun, imperfecziuns e tut quai che tutga vitiers vegn savens era tematisà en la musica. Qua in schatg d'intginas chanzuns:
Tge è lura bel?
Sch'i va per l'optica ha la scienza gia empruvà bleras giadas da chattar ina resposta sin la dumonda tge che fa attractiv ina persuna. Studis han mussà che cunzunt ina tscherta simmetria para attractiv. Perquai vegn era savens discurrì dal tagl d'aur. Pia tut quai che correspunda ad ina norma e betg individualitad. Per l'ina giogan influenzas culturalas, las experientschas da la vita e per l'autra la biologia, la sexualitad e la reproducziun ina rolla tge che nus percepin sco attractiv vi d'autras persunas.
Mintga uman vul dar en egl, vul ch'el plascha als auters. La fin finala vul mintga uman vegnir charezzà.
Ins pudessi dir che be las valurs internas quintan, ma quai fiss vis memia simpel l'uman, di Arno Arquint ch'è psicolog e psicoterapeut. Ils umans dovrian la bellezza, la bellezza saja era insatge che fetschia bain.
Bellezza e tge che nus vesain sco bel saja segir ina convenziun, ma per part era ina lescha interna, pia in pau era ina dumonda da la biologia. Perquai ch'i dettia ideals da bellezza po quai era chaschunar cumplex, po crear obsessiuns ed avair ina gronda influenza sin la stima da sa sez e cunquai era sin il bainstar.
In experiment
Sche la cumparsa daventa in'obsessiun
Rudolf Liun Ganzoni ha gì avant 5 onns ina fasa nua che sia optica quintava pli bler ch'usità. Lura è el numnadamain sa participà ad ina concurrenza da bodybuilding. Mintga past quintava e tar mintga di tutgavan enturn tschintg uras sport latiers. Tut per correspunder ad in ideal creà da la scena da bodybuilding e la finala la giuria da la concurrenza.
Jau chat quai tup da simplamain dir che musclas èn bellas, era auter po far bel in um. Tge ch'jau stoi però era dir sco giuven u sco buob èn ins savens confruntads cun quai maletg che quai saja l'ideal.
Rudolf Liun Ganzoni e vegnì terz a questa occurenza en sia categoria. Suenter questa experientscha da cunfin èsi dentant stà a fin per el. I saja stà grev per el da vegnir ora da ses ritmus e vegnir davent da quai ch'era in pau era in disturbi da mangiar e per part era ina dismorphia. Oz fa Rudolf Liun Ganzoni anc adina gugent sport, ma il bodybuilder da lezzas uras è per el in pau sco in auter uman.
En l'atgna praschun da la perfecziun
Tar Fia Tuor era gia cun 11 onns insatge auter che tar las bleras mattas. Ella ha numnadamain ina furma dad alopezia, quai munta ch'ella perda ils chavels. Ella ha dentant ditg betg savì ch'i saja pervia da quai ed ha ditg empruvà da zuppar quai.
Era sch'insatgi na veseva betg gist quai sin l'emprima egliada, jau era adina confruntada cun quai, perquai avev jau atgnamain adina il pli grond problem cun sasezza.
Enfin ch'ella ha gì avunda da sa zuppar avant in onn ed è sa decidida da purtar peruccas e lura da tagliar giu tut ils chavels.
Per Fia Tuor ha la bellezza adina giugà ina gronda rolla. Ella è cosmeticra ed ha da far di per di durant la lavur cun bellezza. Ella ha ditg tschertgà la perfecziun, ma è sa fatschentada fitg cun sasezza ed ha emprendì che bellezza n'è betg tut.
Jau poi engraziar a l'alopezia che jau hai stuì sa fatschentar pli fitg cun mai e tgi che jau sun. Perquai hai jau fatg quest pass. Pertge sche ti ta defineschas entras tes vesair ora, sche quai n'è lura betg pli, tgi es ti lura anc?
Nus dain in cuc davos las culissas, explitgain e mettain en context, sajan quai fenomens novs, u istorgias pac enconuschentas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.