En La populara dad oz udis melodias e sauts vegls en in nov vestgi: Ina da las chapellas che cultiveschan quai stgazi è la Hanneli Musik, fundada il 2002. Suenter 20 onns datti però il cumià, cun ina turnea ed il disc «Gassenhauer». Quel cuntegna bleras melodias enconuschentas, da quellas popularas ed er da quellas da la musica da divertiment da decennis passads.
Gia al principi ha la «Hanneli-Musig» fatg reviver sauts vegls, che han chattà in nov public e che han da blers impuls a la scena da la musica populara. Da la partida èn musicants da num e da pum: Dani Häusler, clarinetta – Fränggi Gehrig, accordeon – Peter Gisler, orgelet e cuntrabass – Fabian Müller, violoncello – Johannes Schmid-Kunz, violina e Ueli Mooser, percussiun, cuntrabass e blers auters instruments. Fin l'onn 2018 è er Christoph Mächler stà commember da la Hanneli-Musig.
Durant ils ultims 20 onns han els registrà otg discs: «Blümchen Wunderhold», lur emprim dal 2004 – e lura «Alpenträume», «Tänzix», «Seeland», «Baselbiet», «Polka ma non troppo» e «Über Stock und Stei» – discs cun tocs vegls tradiziunals però er cun tocs che derivan da cumponists da la musica da divertiment. Quai vala er per lur disc da cumià «Gassenhauer» cun 30 tocs semperverds.
Dapli da la Hanneli-Musig
La musica populara dal Grischun e da la Svizra chatta ses lieu en questa emissiun.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.