Er l'inscunter da chapellas 2022 è annulà
Ils 8 da schaner, in bundant in’emna, fiss stà en il Forum im Ried a Landquart per la 57avla giada l'inscunter da musica populara cun chapellas grischunas e da tut la Svizra. Ina sairada per far musica durant 4 uras. Quai fiss stà in eveniment cun in grond public ch'avess pudì giudair l’atmosfera e star patgific. Però er questa giada è quest bel eveniment vegnì annullà pervi da la situaziun da corona.
L’inscunter da chapellas è in eveniment che ha gronda tradiziun. L’emprim è vegnì organisà il 1965 sin iniziativa dal musicant e cumponist Hans Niederdorfer. Quella giada en il «Marsöl» a Cuira e moderà ha Wysel Gyr. Dapi divers onns è quel inscunter en il Forum im Ried a Landquart che porscha plazza a var 1'000 persunas. Perquai ch’i na dat nagin inscunter ils 8 da schaner avain nus pensà da cumpensar quai cun ina registraziun da temps passads. Nus preschentain ina perla or da noss archiv, parts da la registraziun dal 15avel inscunter ch’è stà ils 6 da schaner dal 1979 en il Marsöl a Cuira e ch'è vegnì preschentà da Burtel Bezzola. Vus udis sauts da las chapellas Bärgfrida, Grischuna, dals Landjägerbueba, dals Engadiner Ländlerfründa, da la chapella Oberalp ed er da la chapella dal seminari da magisters.
La musica populara dal Grischun e da la Svizra chatta ses lieu en questa emissiun.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.