René Wicky è ina corifea da la musica populara svizra. Dapi decennis fa el musica cun pliras chapellas enconuschentas, uschia cun las furmaziuns dals Ribarys, cun la chapella Dünner-Mooser-Wicky ed er cun sia chapella René Wicky.
1'000 cumposiziuns
René Wicky ha cumponì sur 1'000 tocs da musica populara ed instrumentala, titels sco «Innerschwyzer-Schtimmig», «Blick uf See und Bärge», «Im Rössli z’Steihuse», «S’Härz am rächte Fläck», «Fröhlich dur s’Läbe», «Erinnerig a schöni Stunde» e «Viel Glück uf de Wäg». Ina da sias melodias las pli enconuschentas é senza dubi il «Schönegg-Marsch».
René Wicky ha cumenzà a far musica cun 12 onns cur che sia famiglia steva en il chantun Soloturn. En las uras d’accordeon ha el mussà in talent spezial e ses magister da musica era da l’avis ch’el pudess daventar in bun musicant. El ha gì raschun!
René Wicky ed ils Ribarys
Pli tard, cura ch’ils Wickys han fatg midada en il chantun Zug ha el cuntinuà ad exercitar, ha participà a la Festa federala d’accordeons a Lucerna ed ha inscuntrà a Jost Ribary senior. Dapi lura suna el cun ils Ribarys: cun Jost Ribary Senior, Jost Ribary Junior e Jost Ribary III.
Il producent da musica
Dal 1969 fin il 1983 è el stà producent da discs tar Polydor e Polygram, e là ha el lavurà cun grondezzas da la musica sco Ernst Mosch e Max Greger. A partir dal 1983 ha el sia atgna interpraisa e cun ses label Corema Records producescha el surtut discs da musica populara e procura per ediziuns da notas.
La musica populara dal Grischun e da la Svizra chatta ses lieu en questa emissiun.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.