Cumenzà ha l’istorgia da la Rümli Gang da l’Engiadina Bassa avant quatter onns. Per l’emprima giada èn alura s'inscuntrads Severin Tönett dad Ardez, Anna Carpanetti da Ftan e Simon Koller dad Ardez, per sunar da cumpagnia musica populara. Alura anc cun il bonus da ‘«jöö» è s'etablida la furmaziun il decurs dal temp adina pli ferm.
La Rümli Gang è ina da las furmaziuns da la giuvna generaziun. L'atun passà ha la furmaziun pudì prender part a la concurrenza per giuvenils da folclora a Gossau, nua che passa 250 giuvenils han pudì mussar lur talent ad ina giuria. La Rümli Gang è avanzada fin en il final.
Dapi quatter onns s’entaupan Severin, Anna e Simon en lur local per far ensemen musica populara, musica da «Ländler». L'uschenumnà «Rümli» è ina stiva da café en la stalla da la famiglia Koller ad Ardez, e questa ha alura era gist dà il num a la furmaziun: Rümli Gang.
Ch'ils trais giuvenils èn sa chattads per far musica ensemen è plitost ina casualitad. Tuts trais han emprendì in instrument l’emprim a chasa en las atgnas quatter paraids. Simon Koller ha emprendì ils instruments che ses fragliuns han laschà d’ina vart, Severin Tönett ha survegnì sco regal in orgelet da Sviz da non e nona, ed Anna è ida ad in curs da musica cun in bon che la mamma aveva gudagnà. Entras ils magisters da musica han els chattà in l’auter e la passiun da sunar en ina furmaziun da «Ländler». Oz din Severin, Anna e Simon che la musica è la colla da lur amicizia.