Nua che Raphael Rauch va, là savura el istorgias. Quai sa mussa gia al cumenzament da la spassegiada si tar la curt episcopala, sin la quala che Vita e cretta ha envidà il teolog e schurnalist.
Anc in zic ord flad da las lungas stgalas, che mainan da la citad veglia si tar la curt da l'uvestg, constatescha Raphael Rauch apaina arrivà sin plazza, che l'uvestgieu da Cuira saja «in grond plazzal da fabrica». L'analogia è evidenta – sin plazza da la curt ramplunan maschinas da construcziun. Il chastè episcopal è amez ina fasa da restauraziun – sco l'uvestgieu cun ses nov uvestg Joseph Maria Bonnemain.
Igl era gist suenter avair finì la reportascha, ch'ina remartga cun in tschegn d'egl ha en ina survegnì ina dinamica nunspetgada: Lain ir ina giada a scalinar tar l'uvestg? E quai vain nus dus schurnalists, Raphael Rauch ed jau, lura er fatg.
En sasez ina simpla istorgia: Ir via, scalinar, ir en, discurrer. Che quai è pussaivel è, per tgi ch'è disà il stil da l'uvestgiu dals decennis passats, pauc auter ch'ina sensaziun.
Cun il nov uvestg Joseph Maria Bonnemain tira definitivamain in vent nov en l'uvestgieu da Cuira – ed in simpel discurs da tschintg minutas daventa uschia spezial, ch'el merita er da far in selfie, perfin per nus schurnalists.
L'epicenter d'istorgias ed intrigas
Per sa scuntrar cun in schurnalist investigativ na datti a Cuira betg in meglier lieu che la plazza cun catedrala e chastè episcopal. Qua, en l'epicenter dad istorgias ed intrigas, datti dapertut analogias, che fan glischar er ils egls da Raphael Rauch:
Nus guardain uss gist sin il santeri e jau ma dumonda natiralmain, tgeninas baras che spetgan sin nus schurnalists en l’uvestgieu da Cuira. En ils ultims trais decennis èn succedidas tantas ingiustias. La baselgia na steva betg per misericordia, ma per ina politica da pussanza conservativa diraglia ed jau pens ch’igl è la lezia da nus schurnalistas e schurnalists da rumir si là.
Avant che lavurar per kath.ch ha l'istoricher e teolog promovì rapportà per ARD, ZDF e la Rundschau da SRF. Il schurnalist Raphael Rauch n'era betg disà da far saramonas. Ina tenuta, ch'el maina vinavant er sco manader da redacziun tar kath.ch.
Kath.ch è il portal da novitads catolic, incumbensà da la baselgia catolic-romana da la Svizra. Da lavurar sco schurnalist investigativ per la baselgia catolica – per Raphael Rauch nagina cuntradicziun.
Betg pledader da medias – ma observatur attent
Er sche sia paja vegnia finanziada la fin dals quints cun las impostas da baselgia, na sa vesa Raphael Rauch betg sco «dirigent che guarda ch’il orchester tuna anc meglier». El saja «il criticher attent en l’emprima lingia», che observa critic ed exact:
Mia incumbensa è da far in portal da novitads catolic, actual e relevant. Latiers na tutgan per mai betg be rapports na critics, ma er schurnalissem investigativ.
Dapi che Rauch è manader da redacziun aud'ins e leg'ins adina puspè dal portal da medias catolic. Kath.ch vegn cità dad autras medias sco funtauna baininfurmada – uschia tar l'elecziun dal nov uvestg da Cuira, cura che kath.ch ha publitgà il protocol secret da l'inscunter dal chapitel catedral.
Lingias grassas ed in lavachau pulit
Ma kath.ch ha er sez procurà per lingias grassas. En il cumbat da votaziun per l'iniziativa per concerns responsabels ha Raphael Rauch pisserà cun in'allusiun istorica al holocaust per chaus cotschens en tut la Svizra.
Er sche ses commentari era istoricamain argumentabel, n'è el betg fruntà sin grondas simpatias – anzi, la conferenza dals uvestgs svizzers e la conferenza centrala catolic-romana èn sa perdunads publicamain e han dà in lavachau a Rauch. El saja sa stgisà e las undas sajan sa calmadas, raquinta Raphael Rauch. Tar las vuschs, che crititgeschan ses stil da rapportar senza schanetg è sia tenuta clera:
Sch’igl dat lura quasi l’eco medial sco prestaziun gartegiada, ma legra quai. Sch’i sveglia protests pens jau tutga quai simplamain tar il ristg professiunal. Sch’ins vul be vegnir amà na dastg’ins betg vegnir schurnalist. Lura ston ins forsa vegnir medi.
A la fin da nossa spassegiada per Vita e cretta è daventà ina pli cler: Raphael Rauch è bain catolic e teolog cumpetent, ma surtut è el schurnalist – e sia missiun è il schurnalissem.
