Per Dominique Caglia è viver ina vita cun senn ina vita nua ch’ins sa viver las atgnas fermezzas, nua ch’ins po passentar temp cun quai ch’ins fa gugent. Saja quai en la professiun, en famiglia u cun amis. Da sa fatschentar cun chaussas ch’ins fa gugent e ch’ins fa er bain dat senn a la vita.
Tar mai persunalmain è quai il rumantsch che dat senn a mia vita. Jau ma fatschent gugent cun il rumantsch en la professiun. E jau dun el er gugent vinavant a mes uffants. Jau scriv gugent texts rumantschs. Per mai è il mund da la Rumantschia insatge che dat bler senn en la vita.
Il senn da la vita saja da contribuir en il mintgadi – en mintga situaziun cun las atgnas fermezzas, vertits e cun quai ch’ins crai – da mantegnair la pasch sin quest mund ed il respect envers il visavi, filosofescha Dominique Caglia.
Ella giavischa in mund da pasch. Natiralmain sajan nus en Svizra priviligiadas. Ella giavischa che quai resta uschia e ch’i dat in mund nua che er la natira vegn respectada.
Jau hai mai gì dubis da survegnir uffants.
Dominique Caglia è gist vegnida mamma, per la segunda giada. Ella di, ch’ella n'haja mai gì dubis da survegnir uffants malgrà ils temps da conflicts e guerras uschè manaivel. Cunzunt perquai ch’ella haja il privilegi da viver en Svizra.
