Il Premi grischun da litteratura 2024 va a l'Engiadinaisa Jessica Zuan, per ses cudesch da poesias «Launa da pavagls». Sco la Fundaziun Premi grischun da litteratura scriva, cuntegnia la terza collecziun lirica ina vusch poetica madirada. Ella stgaffeschia purtrets intensivs e finas reflexiuns da sun e senn en connex cun il motiv da la minalva.
«Launa da pavagls» è cumparì il 2023 en puter tar la Chasa Editura Rumantscha a Cuira, e vegn publitgà l’onn 2024 en in'ediziun bilingua cun ina translaziun en tudestg da Claire Hauser-Pult.
Jessica Zuan è naschida en l'Engiadina e creschida si a La Punt Chamues-ch e Segl Maria. Dapi 17 onns viva ella a Barcelona. Ella ha gia publitgà ils dus cudeschs lirics «L'orizi / La tempête» e «Stremblidas e s-chima / Beben und Schaum / Tremblements et écume».
Ses cudeschs èn vegnids translatads en tudestg, franzos e catalan. E singulas poesias èn vegnidas translatadas en talian, spagnol, galician, polac, basc, rumen ed eston. Ella publitgescha regularmain en revistas ed antologias, e s’engascha en la suprastanza da l’Uniun per la Litteratura Rumantscha e sco coredactura da la revista «Litteratura».
Or da l'archiv
