L’identitad da gender è insatge cumplex e la summa da numerus facturs (biologics, socials e culturals). En Svizra sa defineschan enturn 150'000 persunas sco «nunbinaras». Questas persunas na s'identifitgeschan betg cun il sistem binar ch'ha dominà durant tschientaners. Concret na sa sentan quellas persunas pia betg s'adressadas, cura ch’ins numna ellas «um» ubain «dunna». Sche nus ans distanziain dal sistem binar e contemplain l'identitad da gender sco spectrum cun dapli pussaivladads, lura ha quai era in'influenza sin nossa lingua.
Gist nus Rumantsch:as savain gea bain che la lingua po contribuir a la construcziun d’ina identitad.
Persunas che sa sentivan nunbinaras hai gia adina dà. Ma ozendi s’etableschan adina dapli pleds che gidan a francar e render visiblas questas identitads da gender: nunbinar, genderfluid, transgender, queer etc. Ed era noss verbs, adjectivs e pronoms ston magari vegnir adattads, sch’ins vul «gendrar» - quai vul dir: sch’ins vul duvrar ina lingua che reflectescha e pledenta l’umanitad en tut sias fassettas. Fin qua na devi nagin’unitad concernent il gendrar per rumantsch. Ma ussa exista in mussavia che po gidar a s’avischinar pass per pass ad ina lingua inclusiva.
Quai na fa gea mal a nagin, sche jau scriv 'student:as' – cun in punct dubel.
Or da l'archiv:
Nossa linguista, Marietta Cathomas, dat in'invista pli profunda en connex cun la damonda: co gendrar en il rumantsch?.