Tschintg onns suenter ses davos roman « Ein Winter in Istanbul» cumpara quests dis in nov cudesch dad Angelika Overath. «Unschärfen der Liebe» è la segunda part d'ina trilogia e cun qua ina cuntinuaziun da l'istorgia da l'Engiadinais Cla che aveva chattà sia gronda amur e cumenzà ina nova vita ad Istanbul.
En il nov roman raquinta l'autura d'in viadi tranter vest ed ost ch'il marus da Cla, Baran, fa vun il tren da Cuira ad Istanbul. Il viadi n'è betg mo ina midada da lieu, ma er ina midada radicala da vita che Baran sto far. Ils inscunters en il tren sa maschaidan cun regurdientschas e siemis.
Il viadi da plirs dis finescha cun ina stremblida da l'olma da Baran, ma era da la terra. Ad Istanbul capita in terratrembel, gist cura che Baran arriva.
L'autura Angelika Overath viva dapi 16 onns en Engiadina Bassa. Ella ha scrit plirs romans ed ha publitgà poesias en rumantsch ed en tudestg. Ella fa reportaschas da viadi e scriva criticas da cudeschs en la FAZ. Cun ses um Manfred Koch maina ella ina scola da scriver a Sent. Il viadi cun tren enfin Istanbul ha ella er fatg sezza.